المالى اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ اۋدانداعى جول ينفراقۇرىلىمىن دامىتۋ جانە جولاۋشىلار تاسىمالىنىڭ ساپاسىن ارتتىرۋ جۇمىستارىنا توقتالدى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.

مەگاپوليس باسشىسى بۇگىنگى تاڭدا اۋداندا اعىمداعى جوندەۋ اياسىندا 25 مىڭ شارشى مەتر جول توسەمى جوندەلگەنىن، ال بيىلعى جوسپار – 47 مىڭ شارشى مەتر ەكەنىن حابارلادى.

– ءقازىردىڭ وزىندە 2،3 شاقىرىم تروتۋار جابدىقتالىپ، 2 شاقىرىم ارىق جەلىسى سالىندى، قازان ايىنىڭ سوڭىنا دەيىن تاعى 6،9 شاقىرىم ارىق قامتىلادى. سونداي-اق، وتكەن ايدا 14 كوشەدە 12،5 شاقىرىم جولعا ورتاشا جوندەۋ جۇمىستارى اياقتالدى. قىركۇيەك ايىنىڭ سوڭىنا دەيىن يسايەۆ كوشەسىندە ۇزىندىعى 1،2 شاقىرىم جولعا ورتاشا جوندەۋ جۇمىستارى اياقتالادى، – دەدى ەربولات دوسايەۆ.

قوعامدىق كولىكتە قىزمەت كورسەتۋ ساپاسىن ارتتىرۋعا توقتالعان الماتى اكىمى بيىل جىلجىمالى قۇرام 101 اۆتوبۋسقا، 327-دەن 428 بىرلىككە كوبەيىپ، 24 مارشرۋتتا جاڭارتىلعانىن ايتتى.

جالپى، الماتىدا بيىل ۇزىندىعى 250 شاقىرىم بولاتىن 274 كوشە ورتاشا جوندەۋدەن ءوتتى. وسىلايشا جاقسى جانە قاناعاتتانارلىق جاعدايداعى جولدىڭ ۇلەسىن 92%-عا دەيىن جەتكىزۋ جوسپارلانىپ وتىر.

بۇعان قوسا، جەرگىلىكتى بيۋدجەت ەسەبىنەن گازبەن جۇرەتىن 600 اۆتوبۋس، 100 ەلەكترلى اۆتوبۋس جانە 112 تروللەيبۋس ساتىپ الىنادى. جەكە اۆتوپاركتەر وسى جىلدىڭ ءبىرىنشى جارتىجىلدىعىندا گازبەن جۇرەتىن 150 اۆتوبۋس پەن 15 ەلەكتروبۋس ساتىپ الدى. قازىرگى ۋاقىتتا قالانىڭ تروللەيبۋس پاركى تولىعىمەن جاڭارتىلدى.