Almatynyń keptelisin sheshýdiń joly tabyldy. Májilis depýtaty Daniiar Qasqaraýov premer-ministr Oljas Bektenovke osyndai saýal joldady, dep habarlaidy Dalanews.kz.
Almatyda sońǵy jyldary halyq sany kúrt artqan.
"Kósheler senbi-jeksenbi kúnderi de keptelisten kóz ashpaityn boldy. Al qalaǵa kirip-shyǵatyn joldarmen júrý tipti múmkin emes. Bir ǵana mysal keltireiin: Almaty men Qaskeleńniń arasy nebári - 20 shaqyrym. Sol joldy júrip ótý úshin eki saǵat ýaqyt ketedi. Jurttyń júikesin tozdyrǵan jol azabyn azaitý úshin Úlken Almaty ainalma joly da (BAKAD) salynǵan bolatyn. Biraq ol máseleni múlde sheshpedi", - dedi ol.
Táýligine Almatyǵa syrttan 500 myń kólik kiredi eken.
"Qala irgesindegi joldar men onyń kólik ótkizý qarqyny mundai nópirge eseptelmegen. Tipti shahardyń shyǵaberisterine salynǵan jolairyqtar men kópirler de kómektespei jatyr. Óitkeni qalaǵa jaqyn ornalasqan Qarasai, Jambyl, Talǵar, Ile aýdandarynda bir millionǵa jýyq halyq turady. Sonyń basym kópshiligi Almatyǵa kúndelikti qatynap jumys isteidi, oqidy nemese bala-shaǵasyn mektepke tasidy. Saldarynan qalaǵa kirip-shyǵar joldar kúni-túni iintiresip turady", - dedi ol.
Depýtat "jol azabyn" sheshýdiń birneshe jolyn usyndy:
- "Almatynyń ortalyq kúre joly sanalatyn Abai dańǵylyn Qaskeleń qalasyna deiin uzartý kerek. Bul - kóp shyǵyndy qajet etpeitin joba. Óitkeni memleket muqtajdyǵy úshin alynatyn jer telimderi men kommertsiialyq nysandar jol boiynda óte az. Sondai-aq, jol túsetin aýmaqta injenerlik jelilerdi kóshirý qajettiligi joq.
- Úlken Almaty ainalma jolynan Uzynaǵashqa deiin taǵy bir qosymsha jol salý kerek. Ol Qytaidan shyqqan júk kólikteriniń keptelissiz Almatyny ainalyp ótýine múmkindik beredi. Bul trassa túsetin jer telimderi jekemenshikke satylmaǵan. Bolashaq jol qurylysy úshin jergilikti ákimdiktiń balansynda tur. Tek joba daiyndap, qurylysty qazir-aq bastap ketýge múmkindik bar.
- Saiyn kóshesin uzartyp, Almaty-Astana trassasyna deiin jetkizý kerek. Bul Balqash, Qaraǵandy, Astana baǵytynda qatynaityn kólikterdiń jolyn qysqartyp, ýaqytyn únemdeidi. Sondai-aq, Almaty-Qaskeleń jolyndaǵy kólik júktemesin edáýir azaitady".
