Almatydaǵy úsh birdei jylý elektr ortalyǵynyń (JEO) ekologiialyq jaǵynan tazarýy jaqyn jyldary tolyq aiaqtalýy múmkin. Buǵan qatysty eks-sheneýnik Nur Qanatuly áleýmettik jelidegi jazbasynda birqatar derek keltirdi, dep habarlaidy Dalanews.kz.
Qytai konsortsiýmy JEO-2 nysanyn jańǵyrtady
Nur Qanatulynyń aitýynsha, Almatydaǵy eń iri jylý kózderiniń biri sanalatyn JEO-2-ni qytailyq kompaniialar konsortsiýmy qaita jańǵyrtady. Joba, onyń boljamynsha, Qytai tarapynan beriletin kredit esebinen júzege asýy múmkin.
Qytai infraqurylymdyq jobalarǵa nesie bergen kezde, kelisimshart boiynsha barlyq tehnika, jabdyq jáne qajetti materialdy tek óz óndirýshilerinen satyp alýdy mindetteitini belgili. Sondyqtan JEO-2 tolyqtai qytailyq tehnologiiamen jańarýy yqtimal.
JEO-3-ti qazaqstandyq kompaniia qaita jańǵyrtady
Al JEO-3-tiń rekonstrýktsiiasyn qazaqstandyq kompaniia júzege asyryp jatyr. Joba biznesmen Qairat Itemgenovke tiesili qurylymdardyń baqylaýynda ekeni ashyq derekkózderde kórsetilgen.
JEO-1 gazǵa áldeqashan kóshken
2017 jyldan beri JEO-1 tolyqtai gazben jumys isteidi. Bul nysan qala atmosferasyna túsetin ziiandy qaldyqtardy edáýir azaitqan alǵashqy jylý ortalyǵy bolǵan.
Almatynyń aýasy tazara ma?
Nur Qanatuly Almaty turǵyndary úshin bul ózgeristerdiń mańyzy zor ekenin aitady. Úsh nysan da ekologiialyq taza otynǵa kóshkennen keiin qala aýasynyń jyl on eki ai boiy aitarlyqtai tazaratyny kútiledi.
«Bul barlyq almatylyqtar úshin jaqsy jańalyq. Jaqyn arada aýa áldeqaida taza ári sergek bolmaq», - deidi ol.
Eń úlken másele
Sonymen birge, eks-sheneýnik qalanyń eń úlken ekologiialyq problemasy áli de sheshilmei otyrǵanyn atap ótti. Almatyda búginde 85 jeke qazandyq bar, olardyń bári kómir jaǵady.
«Endigi basty mindet - osy qazandyqtardyń máselesin sheshý», - dep jazady Nur Qanatuly.
