الماتىداعى ءۇش بىردەي جىلۋ ەلەكتر ورتالىعىنىڭ (جەو) ەكولوگيالىق جاعىنان تازارۋى جاقىن جىلدارى تولىق اياقتالۋى مۇمكىن. بۇعان قاتىستى ەكس-شەنەۋنىك نۇر قانات ۇلى الەۋمەتتىك جەلىدەگى جازباسىندا ءبىرقاتار دەرەك كەلتىردى، دەپ حابارلايدى Dalanews.kz.

جۇڭگو كونسورسيۋمى جەو-2 نىسانىن جاڭعىرتادى

نۇر قانات ۇلىنىڭ ايتۋىنشا، الماتىداعى ەڭ ءىرى جىلۋ كوزدەرىنىڭ ءبىرى سانالاتىن جەو-2ء-نى قىتايلىق كومپانيالار كونسورسيۋمى قايتا جاڭعىرتادى. جوبا، ونىڭ بولجامىنشا، جۇڭگو تاراپىنان بەرىلەتىن كرەديت ەسەبىنەن جۇزەگە اسۋى مۇمكىن.

جۇڭگو ينفراقۇرىلىمدىق جوبالارعا نەسيە بەرگەن كەزدە، كەلىسىمشارت بويىنشا بارلىق تەحنيكا، جابدىق جانە قاجەتتى ماتەريالدى تەك ءوز وندىرۋشىلەرىنەن ساتىپ الۋدى مىندەتتەيتىنى بەلگىلى. سوندىقتان جەو-2 تولىقتاي قىتايلىق تەحنولوگيامەن جاڭارۋى ىقتيمال.

جەو-3ء-تى قازاقستاندىق كومپانيا قايتا جاڭعىرتادى

ال جەو-3ء-تىڭ رەكونسترۋكسياسىن قازاقستاندىق كومپانيا جۇزەگە اسىرىپ جاتىر. جوبا بيزنەسمەن قايرات يتەمگەنوۆكە تيەسىلى قۇرىلىمداردىڭ باقىلاۋىندا ەكەنى اشىق دەرەككوزدەردە كورسەتىلگەن.

جەو-1 گازعا الدەقاشان كوشكەن

2017 جىلدان بەرى جەو-1 تولىقتاي گازبەن جۇمىس ىستەيدى. بۇل نىسان قالا اتموسفەراسىنا تۇسەتىن زياندى قالدىقتاردى ەداۋىر ازايتقان العاشقى جىلۋ ورتالىعى بولعان.

الماتىنىڭ اۋاسى تازارا ما؟

نۇر قانات ۇلى الماتى تۇرعىندارى ءۇشىن بۇل وزگەرىستەردىڭ ماڭىزى زور ەكەنىن ايتادى. ءۇش نىسان دا ەكولوگيالىق تازا وتىنعا كوشكەننەن كەيىن قالا اۋاسىنىڭ جىل ون ەكى اي بويى ايتارلىقتاي تازاراتىنى كۇتىلەدى.

«بۇل  بارلىق الماتىلىقتار ءۇشىن جاقسى جاڭالىق. جاقىن ارادا اۋا الدەقايدا تازا ءارى سەرگەك بولماق»، - دەيدى ول.

ەڭ ۇلكەن ماسەلە

سونىمەن بىرگە، ەكس-شەنەۋنىك قالانىڭ ەڭ ۇلكەن ەكولوگيالىق پروبلەماسى ءالى دە شەشىلمەي وتىرعانىن اتاپ ءوتتى. الماتىدا بۇگىندە 85 جەكە قازاندىق بار، ولاردىڭ ءبارى كومىر جاعادى.

«ەندىگى باستى مىندەت - وسى قازاندىقتاردىڭ ماسەلەسىن شەشۋ»، - دەپ جازادى نۇر قانات ۇلى.