Qazirgi tańda Qazaqstan úkimetinde sheshim qabyldaityn negizgi quramda 26 adam bar. Olardyń qai óńirden shyqqanyna zer salyp qaraǵanda, biliktiń geografiialyq bet-beinesi aiqyndalady. Úkimettegi eń yqpaldy top Almaty qalasy men Almaty oblysynyń ókilderinen quralǵan. 11 ministrdiń osy óńirden shyqqany kezdeisoqtyq emes, bul elimizdiń saiasi jáne ekonomikalyq ortalyǵynyń ońtústikke qarai aýysqanynyń bir kórinisi bolýy da ǵajap emes, dep habarlaidy Dalanews.kz NewTimes.kz-ke siltep.
Almatydan shyqqan ministrlerdiń ishinde Premer-ministr Oljas Bektenov pen onyń úsh orynbasary (Qanat Bozymbaev, Murat Nurtileý, Ermek Kósherbaev) bar ekeni nazar aýdararlyq jait. Qarjy, ádilet, tsifrlyq damý, energetika syndy strategiialyq mańyzdy salalardy basqaryp otyrǵan tulǵalardyń da osy óńirden bolýy Almaty elitasynyń memlekettik sheshimderge tikelei yqpal etý múmkindigin arttyryp otyr.
Ekinshi bir nazar aýdarýǵa turarlyq másele – eldiń batys aimaqtarynyń úkimet quramynan tys qalýy. Qazaqstan ekonomikasynyń tiregi sanalatyn munai-gaz óndiretin aimaqtar – Atyraý, Mańǵystaý, Batys Qazaqstan oblystarynyń ókilderi ministrlik oryndardan múlde shet qalǵan. Bul faktor atalǵan óńirlerdiń saiasi sheshim qabyldaý protsesterinen oqshaýlanýynyń belgisi bolýy múmkin.
Kerisinshe, ónerkásiptik-ekonomikalyq jáne áleýmettik belsendiligi joǵary Qaraǵandy, Pavlodar, Shyǵys Qazaqstan men soltústik óńirlerdiń saiasi elitasy úkimet quramynda turaqty pozitsiiaǵa ie. Mysaly, birinshi vitse-premer Roman Skliar Pavlodardan, ishki ister ministri Erjan Sádenov Shyǵys Qazaqstannan, saýda ministri Arman Shaqqaliev Qaraǵandydan shyǵyp, óz óńirleriniń saiasi bedelin nyǵaityp otyr.
Jalpy alǵanda, ońtústik óńirlerdiń basymdyǵy aiqyn baiqalady. Ministrler kabinetiniń 40%-y ońtústikten shyqqan. Qyzylordadan shyqqan úkimet apparaty basshysy Ǵalymjan Qoishybaev, densaýlyq saqtaý ministri Aqmaral Álnazarova jáne bilim ministri Ǵani Beisembaev ońtústiktiń úkimettegi ornyn kúsheitip otyr. Al Jambyl oblysynan shyqqan eki ministr – sý resýrstaryn basqaratyn Nurjan Nurjigitov pen kólik ministri Nurlan Saýranbaev ta osy tendentsiiany jalǵastyrady.
Úkimet músheleriniń jasy da ózara toptasýdy ańǵartady. 1969 jyly týǵan Serik Jumanǵarin, Qanat Bozymbaev, Ǵani Beisembaev pen Dáýren Qosanovtyń úkimette qatar júrýi, saiasi sheshimderde olardyń ortaq ustanymy men yntymaqtastyǵyn kúsheitýi yqtimal.
Degenmen, ministrler quramyndaǵy genderlik teńsizdik máselesi áli de ózekti kúiinde qalyp otyr. 26 adamnyń nebári úsheýi ǵana – áiel. Osy úsh áieldiń ózi mádeniet, áleýmettik qorǵaý jáne densaýlyq saqtaý sekildi «dástúrli» salalardy basqarýy Qazaqstan úkimetindegi genderlik saiasattyń simvoldyq deńgeiden asa almai otyrǵanyn kórsetedi.
Bul úrdister Qazaqstannyń saiasi-ekonomikalyq damýyna ǵana emes, aimaqaralyq elitalar arasyndaǵy qarym-qatynastarǵa da tikelei áser etedi. Úkimettiń geografiialyq quramy aldaǵy ýaqytta óńirler arasyndaǵy básekelestikti kúsheitip, jańa saiasi tepe-teńdik qalyptastyrýy múmkin.
