Almaty sotynda jazda bolǵan avtobýs apatyna qatysty is boiynsha ashyq sot talqylaýy bastaldy. Jol apatynan bir adam qaza taýyp, 25 jolaýshy ártúrli dárejede jaraqat aldy. Sot otyrysynda prokýror aiyptaý qorytyndysyn oqydy, - dep habarlaidy Dalanews.kz Tengrinews.kz-ke siltep.
Sottalýshy S.-ǵa Qazaqstan Respýblikasy Qylmystyq kodeksiniń 345-babynyń 3-bóligi ("Abaisyzda adam ólimine ákep soqqan is-áreket") boiynsha aiyp taǵylyp otyr.
Memlekettik aiyptaý boiynsha 2024 jylǵy 26 maýsymda Kia Sportage kóliginiń júrgizýshisi Masanchi kóshesimen ońtústik baǵytta kele jatyp, saǵat 13:55-te Maqataev kóshesiniń qiylysyna jetken. Jol qozǵalysy erejeleriniń 13.101-tarmaǵyn buzyp, "jol berińiz" jol belgisin elemei, Maqataev kóshesiniń jol bóligine shyqqan. Saldarynan avtobýspen soqtyǵysqan.
"Avtobýs baǵdarshamǵa soǵyldy, keiin trotýarǵa shyǵyp, dúkenge soǵyldy. Apat saldarynan avtobýs jolaýshylarynyń biri oqiǵa ornynda qaza boldy. Dene jaraqaty bar jolaýshylar meditsinalyq mekemege jetkizildi", - dedi prokýror.
Memlekettik aiyptaýshy sottalýshynyń jol qozǵalysy erejelerin buzǵanyn, bul abaisyzda adamnyń ólimine ákep soqqanyn aitty. Osylaisha, onyń áreketteri QR QK 345-babynyń 3-bóliginde kózdelgen qylmystyq quqyqbuzýshylyq retinde saralanady.
Sottalýshy sol kúni kólikpen úiine qarai bet alǵanyn aitty. Ol kezde qyzy nebári tórt ailyq bolǵandyqtan, ony tamaqtandyrý úshin jumystan kele jatqan.
"Men solǵa qaradym, barlyq kóliktiń ótkenin kúttim, Masanchi kóshesinen baǵdarsham bolmaǵandyqtan, qozǵala bastadym jáne soqqyny sezindim. Bir sátte esimnen tanyp qaldym. Oianǵannan keiin avtobýsty kórdim, oǵan júgirý úshin kólikten túspek boldym, esik keptelip qaldy, ony iterip jiberdim, adamdar birden maǵan qarai júgirdi, biraq avtobýcqa qarai bettedim. Jedel járdem shaqyryp, aiaǵyna deiin boldym", - dedi sottalýshy.
Saraptama sottalýshy saǵatyna 20 shaqyrym jyldamdyqpen júrgenin kórsetti. Sottalýshynyń kólik júrgizý ótili - toǵyz jyl. Buryn ol qylmystyq jaýapkershilikke tartylmaǵan. Sotta sottalýshy kinásin tolyq moiyndap, jasaǵan isine ókingen. Ol barlyq jábirlenýshiden kópshilik aldynda keshirim surady.
Sonymen qatar, sottalýshynyń advokaty sotaldy tergeý barysynda aiyptalýshynyń týystary zardap shekkendermen kezdesip, keltirilgen zalaldy tolyǵymen ótegenin habarlady.
"Jábirlenýshi tarap moraldyq keshirimdi qabyldap, keltirilgen shyǵyndy materialdyq óteýden tolyǵymen bas tartty", - dedi advokat.
Aita keteiik, oqiǵa 2024 jyly 26 maýsymda Almatyda boldy.
