الماتى سوتىندا جازدا بولعان اۆتوبۋس اپاتىنا قاتىستى ءىس بويىنشا اشىق سوت تالقىلاۋى باستالدى. جول اپاتىنان ءبىر ادام قازا تاۋىپ، 25 جولاۋشى ءارتۇرلى دارەجەدە جاراقات الدى. سوت وتىرىسىندا پروكۋرور ايىپتاۋ قورىتىندىسىن وقىدى، - دەپ حابارلايدى Dalanews.kz Tengrinews.kz-كە سىلتەپ.
سوتتالۋشى س.-عا قازاقستان رەسپۋبليكاسى قىلمىستىق كودەكسىنىڭ 345-بابىنىڭ 3-بولىگى ("ابايسىزدا ادام ولىمىنە اكەپ سوققان ىس-ارەكەت") بويىنشا ايىپ تاعىلىپ وتىر.
مەملەكەتتىك ايىپتاۋ بويىنشا 2024 جىلعى 26 ماۋسىمدا Kia Sportage كولىگىنىڭ جۇرگىزۋشىسى ماسانچي كوشەسىمەن وڭتۇستىك باعىتتا كەلە جاتىپ، ساعات 13:55-تە ماقاتايەۆ كوشەسىنىڭ قيىلىسىنا جەتكەن. جول قوزعالىسى ەرەجەلەرىنىڭ 13.101-تارماعىن بۇزىپ، "جول بەرىڭىز" جول بەلگىسىن ەلەمەي، ماقاتايەۆ كوشەسىنىڭ جول بولىگىنە شىققان. سالدارىنان اۆتوبۋسپەن سوقتىعىسقان.
"اۆتوبۋس باعدارشامعا سوعىلدى، كەيىن تروتۋارعا شىعىپ، دۇكەنگە سوعىلدى. اپات سالدارىنان اۆتوبۋس جولاۋشىلارىنىڭ ءبىرى وقيعا ورنىندا قازا بولدى. دەنە جاراقاتى بار جولاۋشىلار مەديسينالىق مەكەمەگە جەتكىزىلدى"، - دەدى پروكۋرور.
مەملەكەتتىك ايىپتاۋشى سوتتالۋشىنىڭ جول قوزعالىسى ەرەجەلەرىن بۇزعانىن، بۇل ابايسىزدا ادامنىڭ ولىمىنە اكەپ سوققانىن ايتتى. وسىلايشا، ونىڭ ارەكەتتەرى ق ر قك 345-بابىنىڭ 3-بولىگىندە كوزدەلگەن قىلمىستىق قۇقىقبۇزۋشىلىق رەتىندە سارالانادى.
سوتتالۋشى سول كۇنى كولىكپەن ۇيىنە قاراي بەت العانىن ايتتى. ول كەزدە قىزى نەبارى ءتورت ايلىق بولعاندىقتان، ونى تاماقتاندىرۋ ءۇشىن جۇمىستان كەلە جاتقان.
"مەن سولعا قارادىم، بارلىق كولىكتىڭ وتكەنىن كۇتتىم، ماسانچي كوشەسىنەن باعدارشام بولماعاندىقتان، قوزعالا باستادىم جانە سوققىنى سەزىندىم. ءبىر ساتتە ەسىمنەن تانىپ قالدىم. ويانعاننان كەيىن اۆتوبۋستى كوردىم، وعان جۇگىرۋ ءۇشىن كولىكتەن تۇسپەك بولدىم، ەسىك كەپتەلىپ قالدى، ونى يتەرىپ جىبەردىم، ادامدار بىردەن ماعان قاراي جۇگىردى، ءبىراق اۆتوبۋcقا قاراي بەتتەدىم. جەدەل جاردەم شاقىرىپ، اياعىنا دەيىن بولدىم"، - دەدى سوتتالۋشى.
ساراپتاما سوتتالۋشى ساعاتىنا 20 شاقىرىم جىلدامدىقپەن جۇرگەنىن كورسەتتى. سوتتالۋشىنىڭ كولىك جۇرگىزۋ ءوتىلى - توعىز جىل. بۇرىن ول قىلمىستىق جاۋاپكەرشىلىككە تارتىلماعان. سوتتا سوتتالۋشى كىناسىن تولىق مويىنداپ، جاساعان ىسىنە وكىنگەن. ول بارلىق جابىرلەنۋشىدەن كوپشىلىك الدىندا كەشىرىم سۇرادى.
سونىمەن قاتار، سوتتالۋشىنىڭ ادۆوكاتى سوتالدى تەرگەۋ بارىسىندا ايىپتالۋشىنىڭ تۋىستارى زارداپ شەككەندەرمەن كەزدەسىپ، كەلتىرىلگەن زالالدى تولىعىمەن وتەگەنىن حابارلادى.
"جابىرلەنۋشى تاراپ مورالدىق كەشىرىمدى قابىلداپ، كەلتىرىلگەن شىعىندى ماتەريالدىق وتەۋدەن تولىعىمەن باس تارتتى"، - دەدى ادۆوكات.
ايتا كەتەيىك، وقيعا 2024 جىلى 26 ماۋسىمدا الماتىدا بولدى.
