Almatyda Almaty Museum of Arts zamanaýi óner mýzeiiniń tanystyrylymy ótti. Is-sharaǵa Qazaqstan Respýblikasynyń Mádeniet jáne aqparat ministri Aida Balaeva, Almaty qalasynyń ákimi Darhan Satybaldy, kásipker ári metsenat Nurlan Smaǵulov, qazaqstandyq jáne sheteldik mádeniet qairatkerleri, sondai-aq, 30-dan astam halyqaralyq basylym ókilderi qatysty, dep habarlaidy Dalanews.kz.
Jiynda sóz alǵan mádeniet jáne aqparat ministri bul aýqymdy jobanyń júzege asyrylýy Qazaqstannyń mádeni ári rýhani ómirindegi mańyzdy oqiǵa ekenin atady.
«Memleket basshysy Qasym-Jomart Toqaev Joldaýynda búgingi jas urpaq dástúrli qundylyqtarmen qatar, jańashyldyq pen jasampazdyqty da patriotizmniń basty negizi retinde kóretinin aitqan bolatyn. Osy turǵyda jańa mýzei dástúr men jańashyldyqty ushtastyratyn, Qazaqstan men Ortalyq Aziia mádenietin shetelge pash etetin alańǵa ainalady», – dedi Aida Balaeva.
Jańa mádeni orda halyq úshin 12 qyrkúiekten bastap ashylady. Mýzei 56 mlrd 160 mln teńge jeke investitsiia esebinen boi kótergen. Jalpy aýmaǵy 10 060 sharshy metr bolatyn qurylys eki qiylysqan ǵimarattan turady. Bir mezette 500 qonaq qabyldai alatyn keńistik britandyq sáýletshilerdiń jobasymen jasalyp, tabiǵat pen qala kórinisterimen úilesedi. Zamanaýi talaptarǵa sai jabdyqtalǵan ǵimarat óner týyndylaryn saqtaýǵa, kórsetýge jáne qalpyna keltirýge qajetti barlyq jabdyqpen qamtylǵan.
Kórme zaldary Qazaqstannyń mádeni murasy men tabiǵi bailyǵyn dáripteýmen qatar, qazaqstandyq jáne álemdik zamanaýi sýretshilerdiń týyndylaryna arnalǵan.
Almaty qalasynyń ákimi Darhan Satybaldy quttyqtaý sózinde bul mýzeidiń ashylýyn qalanyń jan-jaqty damýynyń belgisi dep atady.
«Almaty – elimizdiń mádeni ortalyǵy. Mundai keshenniń ashylýy – qalamyz úshin erekshe oqiǵa. Bul jastardyń kreativti oilaýyn damytýǵa, olardyń mádeniet salasynda ózin synap kórýge yqpal etedi. Sonymen qatar Almatynyń týristik jáne ekonomikalyq áleýetin de jańa deńgeige kóteredi», – dedi qala ákimi.
Mýzeidiń negizin belgili qazaqstandyq kásipker ári metsenat Nurlan Smaǵulov qalaǵan. Ol óziniń jeke qorynan Qazaqstan, Ortalyq Aziia jáne ózge de el sýretshileriniń 700 týyndysyn mýzeige syiǵa tartty.
Jańa óner ordasy halyqaralyq deńgeidegi jobalardy, ýaqyt ozǵan saiyn jańaryp otyratyn kórmelerdi, bilim berý baǵdarlamalaryn, sheberlik dáristerin, kásibi qor saqtaý men restavratsiia sheberhanasyn, sondai-aq kitaphanany qamtityn zamanaýi mádeni ortalyq retinde qalyptaspaq.
Kóriktendirilgen 5 000 sharshy metrlik aýmaqta ashyq aspan astyndaǵy músinder, sýburqaqtar men demalys oryndary ornalasqan.
