«Jas Qanat» turǵyn úi kesheninde ornalasatyn Almaty kitaphanalarynyń jańa filialynda interaktivti aimaqtary, tsifrlyq servisteri jáne shyǵarmashylyq sheberhanalary bar zamanaýi balalar kitaphanasy ashylady. Bul ideia segiz almatylyq kitaphanashy Estoniia, Finliandiia jáne Shvetsiiada ótken «Shekarasyz bilim» atty halyqaralyq taǵylymdamadan keiin týyndady. Bul týraly Almaty qalasy Mádeniet basqarmasy málimdedi- dep habarlaidy Dalanews.kz
Tallinde mamandar kitaphanalardyń balabaqshala jáne mekteptermen yqpaldasýyn, urpaqaralyq oqytý úlgilerin zerttedi. Helsinkide tsifrlyq ózin-ózi qyzmet kórsetý júiesin: sensorly dúńgirshekter men QR-gidterdi, OODI Ulttyq kitaphanasynyń tájiribesin kórdi. Shvetsiiada ǵylym, tehnologiia, injeneriia, óner jáne matematikany biriktiretin STEAM-jobalarymen tanysty.
Bul ideialar qazirdiń ózinde engizilip jatyr: orta bilim berý uiymdarymen áriptestik aýqymy keńeiip, balalardy mektep tabaldyryǵyn attaǵan sátten bastap kitap oqýǵa baýlý múmkindigi artty; úiirme baǵdarlamalary jańartyldy; Alatau Creative Hub bazasynda oqý men shyǵarmashylyq kezdesýlerge arnalǵan jazǵy terrasa jasaqtaldy.
«Bul taǵylymdama qyzmetkerlerimizge shabyt qana emes, naqty quraldar da berdi. Jańa filialda interaktivti aimaqtary, tsifrlyq servisteri jáne sheberhanalary bar zamanaýi balalar kitaphanasy ashylady. 1 qyrkúiekten bastap birinshi synyp oqýshylary úshin ashyq esik kúnderin ótkizemiz, al aǵa býynǵa arnalǵan kompiýterlik saýattylyq baǵdarlamasyn kúsheitemiz. Munyń bári bizdiń mamandar Estoniia, Finliandiia jáne Shvetsiiada kórip, beiimdelgen sheshimder. Qazirdiń ózinde bul jobalar almatylyqtardyń igiligine qyzmet ete bastady», — dedi Almaty kitaphanalarynyń direktory Meiram Bektembaev.
Bul almatylyq kitaphanashylardyń alǵashqy halyqaralyq taǵylymdamasy emes. Buǵan deiin 22 maman Koreia Respýblikasynda, Shveitsariia men Germaniiada bilim alǵan. Úzdik tájiribeler Almaty kitaphanalaryn zamanaýi bilim, tehnologiia jáne mádeni qarym-qatynas ortalyqtary retinde damytýǵa jol ashyp otyr.
Búginde qala turǵyndaryna táýlik boiy qyzmet kórsetetin 24/7 kitaphana filialdary, metro men saýda ortalyqtaryndaǵy avtonomdy ózin-ózi qyzmet kórsetý beketteri, tsifrlyq kitap qory bar almatylibrary.kz portaly, inkliýzivti alańdar jáne mazmundy mádeni-tanymdyq is-sharalar baǵdarlamalary qoljetimdi.
