Almatyda 18-19 tamyz kúnderi Túrki memleketteri uiymynyń (TMU) IV Halyqaralyq jastar festivali ótip jatyr,- dep habarlaidy Dalanews.kz
Is-sharaǵa Túrki memleketteri uiymyna múshe elder – Qazaqstan, Ázerbaijan, Qyrǵyzstan, Túrkiia jáne Ózbekstannan delegattar qatysýda. Festival aiasynda jastar saiasaty, kásipkerlik, azamattyq belsendilik jáne áleýmettik bastamalardy damytý baǵyttarynda seminalar uiymdastyrylyp, jas kóshbasshylar men kásipkerler bas qosady.
Jiynnyń resmi ashylýy barysynda Almaty qalasyna «2025 jylǵy Túrki áleminiń jastar astanasy» mártebesi berildi. Saltanatty sharaǵa Memleket basshysy Qasym-Jomart Toqaev arnaiy quttyqtaý hatyn joldady. Ony Qazaqstan Respýblikasynyń Mádeniet jáne aqparat ministri Aida Balaeva oqyp berdi.
«Almaty – azattyǵymyzdyń altyn besigi, jasampaz jastardyń qutty mekeni. Órkenietimizdiń órisin keńeitýge ólsheýsiz úles qosqan kóptegen uly tulǵalarymyz osy qalada ósip-óngen. Shyn máninde, tól mádenietimizdiń temirqazyǵyna ainalǵan shejireli shahar qazaq eliniń ǵana emes, túrki memleketteriniń de rýhani ordasy sanalady.
Búgin asqaraly Alataýdyń baýraiynda túbi bir túrki jurtynyń bilimpaz, daryndy ári belsendi jastary bas qosyp otyr. Irgeli is-shara aiasynda jańa dostar taýyp, tyń ideialar men jobalardy júzege asyrasyzdar dep senemin. Órenderimizdiń birligi bekem bolsa, túrki áleminiń tuǵyry myǵym, bolashaǵy jarqyn bolary sózsiz», – delingen Memleket basshysynyń quttyqtaýynda.
Sondai-aq 2024 jylǵy jastar astanasy - Lenkoran qalasy, Ázerbaijan eliniń ókilderi jastar astanasy kiltin Almaty jastaryna tabystap, baýyrlastyq estafetasyn jalǵady.
