Almaty ákimi Darhan Satybaldy taýly aimaqtaǵy muzdaq kólder men selden qorǵaý infraqurylymynyń jaǵdaiyn tikushaqpen sholý arqyly tekserdi. Buǵan qala ákiminiń orynbasarlary, «Qazseldenqorǵaý» memlekettik mekemesiniń, Tótenshe jaǵdailar departamentiniń jáne sala basqarmalarynyń basshylary da qatysty,- dep habarlaidy Dalanews.kz
Tikushaqpen sholý barysynda «Medeý», «Úlken Almaty», «Qarǵaly» sý bógetteri men Aqsai, Kishi jáne Úlken Almaty ózenderiniń basseinderinde ornalasqan №6, 8, 9, 10 jáne 13-Bis muzdaq kólderi sekildi negizgi selden qorǵaý nysandary qamtyldy. Tótenshe jaǵdailar departamenti, «Qazseldenqorǵaý» jáne Seismikalyq qaýipsizdik pen jumyldyrý daiyndyǵy basqarmasy basshylarymen birlesip, aldaǵy jumystar talqylandy.
Búginde Almaty taýlarynda 51 muzdaq kól bar. Onyń 14-inde buzylý qaýpi bolsa, 6-ýy eń joǵary qaýip tóndiretin nysandar qatarynda. Bul kólder halyq tyǵyz qonystanǵan aimaqtar arqyly aǵatyn ózenderdiń bastaýynda ornalasqan.
«Qazseldenqorǵaý» mekemesiniń AGETÝ basshysy Samat Dáýlenqanovtyń aitýynsha, qaýipti nysandarda sý deńgeiin tómendetý, sifon jelilerin iske qosý jáne evakýatsiialyq arnalardy tazalaý sekildi aldyn alý sharalary josparlanǵan. Sondai-aq, baqylaý kúsheitilip, 31 avtomatty stantsiia, 23 baqylaý beketi men 8 maýsymdyq núkte jumys istep tur. Arnaiy tehnikamen jabdyqtalǵan jedel is-qimyl toby qurylyp, kezekshilik uiymdastyrylǵan.
Tikushaqpen sholý kezinde gidrotehnikalyq qurylystar – bógetter men selden qorǵaý bógetteriniń tehnikalyq jaǵdaiyna erekshe nazar aýdaryldy. Keibir nysandarǵa jóndeý nemese qaita qurý sheshimin qabyldaý úshin jan-jaqty tekseris qajet ekeni anyqtaldy. Sondai-aq, taýly bólimshelerdi arnaiy tehnikamen, qural-jabdyqtarmen jáne meteoquraldarmen qosymsha jabdyqtaý qajettiligi aityldy.
Marshrýt Almaty taý klasteriniń ortalyq aimaǵy arqyly aiaqtaldy. «Chimbulak Development» JShS direktory Rinat Ábdirahmanov arqan joldar jelisin keńeitý, trassalar men infraqurylymdy damytý josparyn tanystyrdy. 2028 jylǵa qarai klasterlik aimaqtyń ótkizý qabileti kúnine 6 myńnan 34 myń adamǵa deiin artpaq. Joba jeke investorlar men halyqaralyq seriktesterdiń qarjysy esebinen júzege asyrylyp jatyr.
Qala basshysy týrizmdi damytý tabiǵi qaýip-qaterlerden almatylyqtar men qala qonaqtaryn qorǵaý sharalarymen tyǵyz bailanysta júrgizilýge tiis ekenin atap ótti.
