الماتى اكىمى دارحان ساتىبالدى تاۋلى ايماقتاعى مۇزداق كولدەر مەن سەلدەن قورعاۋ ينفراقۇرىلىمىنىڭ جاعدايىن تىكۇشاقپەن شولۋ ارقىلى تەكسەردى. بۇعان قالا اكىمىنىڭ ورىنباسارلارى، «قازسەلدەنقورعاۋ» مەملەكەتتىك مەكەمەسىنىڭ، توتەنشە جاعدايلار دەپارتامەنتىنىڭ جانە سالا باسقارمالارىنىڭ باسشىلارى دا قاتىستى،- دەپ حابارلايدى Dalanews.kz
تىكۇشاقپەن شولۋ بارىسىندا «مەدەۋ»، «ۇلكەن الماتى»، «قارعالى» سۋ بوگەتتەرى مەن اقساي، كىشى جانە ۇلكەن الماتى وزەندەرىنىڭ باسسەيندەرىندە ورنالاسقان №6، 8، 9، 10 جانە 13-بيس مۇزداق كولدەرى سەكىلدى نەگىزگى سەلدەن قورعاۋ نىساندارى قامتىلدى. توتەنشە جاعدايلار دەپارتامەنتى، «قازسەلدەنقورعاۋ» جانە سەيسميكالىق قاۋىپسىزدىك پەن جۇمىلدىرۋ دايىندىعى باسقارماسى باسشىلارىمەن بىرلەسىپ، الداعى جۇمىستار تالقىلاندى.
بۇگىندە الماتى تاۋلارىندا 51 مۇزداق كول بار. ونىڭ 14-ىندە بۇزىلۋ ءقاۋپى بولسا، 6-ۋى ەڭ جوعارى ءقاۋىپ توندىرەتىن نىساندار قاتارىندا. بۇل كولدەر حالىق تىعىز قونىستانعان ايماقتار ارقىلى اعاتىن وزەندەردىڭ باستاۋىندا ورنالاسقان.
«قازسەلدەنقورعاۋ» مەكەمەسىنىڭ اگەتۋ باسشىسى سامات داۋلەنقانوۆتىڭ ايتۋىنشا، ءقاۋىپتى نىسانداردا سۋ دەڭگەيىن تومەندەتۋ، سيفون جەلىلەرىن ىسكە قوسۋ جانە ەۆاكۋاسيالىق ارنالاردى تازالاۋ سەكىلدى الدىن الۋ شارالارى جوسپارلانعان. سونداي-اق، باقىلاۋ كۇشەيتىلىپ، 31 اۆتوماتتى ستانسيا، 23 باقىلاۋ بەكەتى مەن 8 ماۋسىمدىق نۇكتە جۇمىس ىستەپ تۇر. ارنايى تەحنيكامەن جابدىقتالعان جەدەل ءىس-قيمىل توبى قۇرىلىپ، كەزەكشىلىك ۇيىمداستىرىلعان.
تىكۇشاقپەن شولۋ كەزىندە گيدروتەحنيكالىق قۇرىلىستار – بوگەتتەر مەن سەلدەن قورعاۋ بوگەتتەرىنىڭ تەحنيكالىق جاعدايىنا ەرەكشە نازار اۋدارىلدى. كەيبىر نىساندارعا جوندەۋ نەمەسە قايتا قۇرۋ شەشىمىن قابىلداۋ ءۇشىن جان-جاقتى تەكسەرىس قاجەت ەكەنى انىقتالدى. سونداي-اق، تاۋلى بولىمشەلەردى ارنايى تەحنيكامەن، قۇرال-جابدىقتارمەن جانە مەتەوقۇرالدارمەن قوسىمشا جابدىقتاۋ قاجەتتىلىگى ايتىلدى.
مارشرۋت الماتى تاۋ كلاستەرىنىڭ ورتالىق ايماعى ارقىلى اياقتالدى. «Chimbulak Development» ج ش س ديرەكتورى رينات ءابدىراحمانوۆ ارقان جولدار جەلىسىن كەڭەيتۋ، تراسسالار مەن ينفراقۇرىلىمدى دامىتۋ جوسپارىن تانىستىردى. 2028 جىلعا قاراي كلاستەرلىك ايماقتىڭ وتكىزۋ قابىلەتى كۇنىنە 6 مىڭنان 34 مىڭ ادامعا دەيىن ارتپاق. جوبا جەكە ينۆەستورلار مەن حالىقارالىق سەرىكتەستەردىڭ قارجىسى ەسەبىنەن جۇزەگە اسىرىلىپ جاتىر.
قالا باسشىسى ءتۋريزمدى دامىتۋ تابيعي قاۋىپ-قاتەرلەردەن الماتىلىقتار مەن قالا قوناقتارىن قورعاۋ شارالارىمەن تىعىز بايلانىستا جۇرگىزىلۋگە ءتيىس ەكەنىن اتاپ ءوتتى.
