Almaty qalasy tabiǵi apat qaýpi joǵary aimaqtardyń biri bolǵandyqtan, Tótenshe jaǵdailar departamenti turǵyndardyń qaýipsizdik mádenietin kúsheitýge baǵyttalǵan keń kólemdi profilaktikalyq jumystardy júieli túrde jalǵastyryp keledi, dep habarlaidy Dalanews.kz.
TJD málimetinshe, qala boiynsha jer silkinisi kezindegi áreketter, biik ǵimarattardaǵy órt qaýipsizdigi, taýly jáne ormandy aýmaqtardaǵy qaýipsizdik, sý aidyndaryndaǵy tártip, sondai-aq balalardyń terezeden qulaýyn aldyn alý siiaqty mańyzdy baǵyttarda túsindirý jumystary belsendi túrde júrip jatyr.
Seismikalyq qaýipsizdik - basty nazarda
Almaty qalasy turǵyndarynyń barynsha qamtylýyn qamtamasyz etý úshin TJD mamandary seismikalyq qaýipsizdik boiynsha keń aýqymdy aqparattyq-túsindirý jumystaryn bastady.
Qala aýmaǵyndaǵy kópqabatty úiler men jeke sektorlarda qutqarýshylar turǵyndarmen jeke kezdesýler ótkizip, olarǵa:
-
«Jer silkinisi kezindegi 10 qarapaiym qadam»,
-
TJ jaǵdaiynda qajet bolatyn «dabyl shabadanynyń» quramy týraly naqty nusqaýlyqtar berdi.
Halyq kóp jinalatyn oryndar nazardan tys emes
Saýda ortalyqtary, biznes nysandary, bilim berý uiymdary syndy adamdar kóp jinalatyn oryndarda da qaýipsizdik erejelerin túsindirý jumystary qatar júrgizildi.
Jospardan tys túrde bilim berý uiymdarynyń basshylary arnaiy oqytýdan ótip, tótenshe jaǵdai kezindegi áreketterdi pysyqtady.
3000-ǵa jýyq nysandyq jattyǵý ótkizild
Qalada jalpy turǵyndardy qamtityn iri seismotreningter uiymdastyryldy. Budan bólek, shamamen 3000-ǵa jýyq mekeme men uiym «nysandyq seismojattyǵýdan» ótti.
Bul jattyǵýlar:
-
mektepterde,
-
balabaqshalarda,
-
aýrýhanalarda,
-
qoǵamdyq oryndarda,
-
iri turǵyn úi keshenderinde júrgizildi.
Oqý-jattyǵý barysynda adamdardy evakýatsiialaý, alǵashqy áreketter, qaýipsiz orynǵa shyǵý daǵdylary pysyqtaldy.
180 myń oqýshy qamtyldy
Balalardyń qaýipsizdigin arttyrý maqsatynda 35 interaktivti sabaq ótkizilip, 180 myńnan astam oqýshy seismikalyq qaýipsizdiktiń negizgi qaǵidalarymen tanystyryldy.
Sonymen qatar qalalyq oqý kýrstarynda 2 myńǵa jýyq turǵyn arnaiy daiyndyqtan ótti.
Qaýipsizdik mádenietin arttyrý - úzdiksiz protsess
Almaty TJD mamandarynyń aitýynsha, tabiǵi jáne tehnogendik qaýipterge daiyn bolý – megapolis turǵyndary úshin asa mańyzdy. Sondyqtan jattyǵýlar men túsindirý jumystaryn jyl boiy jalǵastyrý josparlanǵan.
