الماتى قالاسى تابيعي اپات ءقاۋپى جوعارى ايماقتاردىڭ ءبىرى بولعاندىقتان، توتەنشە جاعدايلار دەپارتامەنتى تۇرعىنداردىڭ قاۋىپسىزدىك مادەنيەتىن كۇشەيتۋگە باعىتتالعان كەڭ كولەمدى پروفيلاكتيكالىق جۇمىستاردى جۇيەلى تۇردە جالعاستىرىپ كەلەدى، دەپ حابارلايدى Dalanews.kz.
تجد مالىمەتىنشە، قالا بويىنشا جەر سىلكىنىسى كەزىندەگى ارەكەتتەر، بيىك عيماراتتارداعى ءورت قاۋىپسىزدىگى، تاۋلى جانە ورماندى اۋماقتارداعى قاۋىپسىزدىك، سۋ ايدىندارىنداعى ءتارتىپ، سونداي-اق بالالاردىڭ تەرەزەدەن قۇلاۋىن الدىن الۋ سياقتى ماڭىزدى باعىتتاردا ءتۇسىندىرۋ جۇمىستارى بەلسەندى تۇردە ءجۇرىپ جاتىر.
سەيسميكالىق قاۋىپسىزدىك - باستى نازاردا
الماتى قالاسى تۇرعىندارىنىڭ بارىنشا قامتىلۋىن قامتاماسىز ەتۋ ءۇشىن تجد ماماندارى سەيسميكالىق قاۋىپسىزدىك بويىنشا كەڭ اۋقىمدى ءاقپاراتتىق-تۇسىندىرۋ جۇمىستارىن باستادى.
قالا اۋماعىنداعى كوپقاباتتى ۇيلەر مەن جەكە سەكتورلاردا قۇتقارۋشىلار تۇرعىندارمەن جەكە كەزدەسۋلەر وتكىزىپ، ولارعا:
-
«جەر سىلكىنىسى كەزىندەگى 10 قاراپايىم قادام»،
-
تج جاعدايىندا قاجەت بولاتىن «دابىل شابادانىنىڭ» قۇرامى تۋرالى ناقتى نۇسقاۋلىقتار بەردى.
حالىق كوپ جينالاتىن ورىندار نازاردان تىس ەمەس
ساۋدا ورتالىقتارى، بيزنەس نىساندارى، ءبىلىم بەرۋ ۇيىمدارى سىندى ادامدار كوپ جينالاتىن ورىنداردا دا قاۋىپسىزدىك ەرەجەلەرىن ءتۇسىندىرۋ جۇمىستارى قاتار جۇرگىزىلدى.
جوسپاردان تىس تۇردە ءبىلىم بەرۋ ۇيىمدارىنىڭ باسشىلارى ارنايى وقىتۋدان ءوتىپ، توتەنشە جاعداي كەزىندەگى ارەكەتتەردى پىسىقتادى.
3000-عا جۋىق نىساندىق جاتتىعۋ وتكىزىلد
قالادا جالپى تۇرعىنداردى قامتيتىن ءىرى سەيسموترەنينگتەر ۇيىمداستىرىلدى. بۇدان بولەك، شامامەن 3000-عا جۋىق مەكەمە مەن ۇيىم «نىساندىق سەيسموجاتتىعۋدان» ءوتتى.
بۇل جاتتىعۋلار:
-
مەكتەپتەردە،
-
بالاباقشالاردا،
-
اۋرۋحانالاردا،
-
قوعامدىق ورىنداردا،
-
ءىرى تۇرعىن ءۇي كەشەندەرىندە جۇرگىزىلدى.
وقۋ-جاتتىعۋ بارىسىندا ادامداردى ەۆاكۋاسيالاۋ، العاشقى ارەكەتتەر، ءقاۋىپسىز ورىنعا شىعۋ داعدىلارى پىسىقتالدى.
180 مىڭ وقۋشى قامتىلدى
بالالاردىڭ قاۋىپسىزدىگىن ارتتىرۋ ماقساتىندا 35 ينتەراكتيۆتى ساباق وتكىزىلىپ، 180 مىڭنان استام وقۋشى سەيسميكالىق قاۋىپسىزدىكتىڭ نەگىزگى قاعيدالارىمەن تانىستىرىلدى.
سونىمەن قاتار قالالىق وقۋ كۋرستارىندا 2 مىڭعا جۋىق تۇرعىن ارنايى دايىندىقتان ءوتتى.
قاۋىپسىزدىك مادەنيەتىن ارتتىرۋ - ۇزدىكسىز پروسەسس
الماتى تجد ماماندارىنىڭ ايتۋىنشا، تابيعي جانە تەحنوگەندىك قاۋىپتەرگە دايىن بولۋ – مەگاپوليس تۇرعىندارى ءۇشىن اسا ماڭىزدى. سوندىقتان جاتتىعۋلار مەن ءتۇسىندىرۋ جۇمىستارىن جىل بويى جالعاستىرۋ جوسپارلانعان.
