Almatyda qylmystyq top memlekettik qurylys tenderlerinde kompaniialardyń reitingin úsh jyl boiy qoldan kóterip, sol arqyly milliondaǵan tabys tapqan. Jalǵan shemamen ainalysqandar qymbat kólikter men úiler satyp alyp úlgergen, dep habarlaidy Dalanews.kz.
Qarjylyq monitoring agenttiginiń málimetinshe, vedomstvonyń Almaty qalasy boiynsha departamenti atalǵan alaiaqtyq iske qatysty tórt kúdiktige qatysty sotqa deiingi tergeý júrgizip jatyr. Tergeý derekterine sáikes, 2021 jyldan 2024 jylǵa deiin olar memlekettik satyp alýlarda túrli aila-sharǵylar arqyly zań buzýshylyqtar jasaǵan.
Kúdiktiler toby jalǵan qujattar arqyly "jalǵan" kompaniialar atynan qurylys salasyndaǵy tenderlerge qatysyp, merdiger kompaniialardyń reitingin qoldan joǵarylatyp otyrǵan. Bul qyzmeti úshin uiymdastyrýshylar árbir satyp alýdan 500 myńnan 1,5 million teńgege deiin "kóleńkeli" syiaqy alyp otyrǵan.
Agenttik úsh jyldyń ishinde olardyń jalpy 664 million teńge zańsyz paida tapqanyn anyqtaǵan. Bul qarajatqa kúdiktiler 11 avtokólik pen 12 jyljymaityn múlik nysanyn (onyń ishinde bes turǵyn úi men jeti jer telimin) satyp alǵan.
Tergeý boljamy boiynsha, kúdiktilerdiń áreketi saldarynan jalpy somasy 70 milliard teńgeni quraityn memlekettik kelisimsharttar zańsyz jasalǵan.
Tórt adam ustalyp, qazirgi ýaqytta ýaqytsha tergeý izoliatoryna qamalǵan. Tergeý jalǵasyp jatyr. Qylmystyq istiń basqa málimetteri protsessýaldyq talaptarǵa sai jariia etilmeidi.
