Almatyda «Mereili otbasy – 2025» ulttyq baiqaýynyń qalalyq kezeńi óz máresine jetti. Finalǵa joldama alǵan 8 otbasy aqtyq kezeńde baq synap, qazylardyń sheshimimen Dúisebaevtar áýleti úzdik otbasy atandy. Endi bul áýlet elordada ótetin respýblikalyq baiqaýda Almaty namysyn qorǵaidy,- dep habarlaidy Dalanews.kz
2014 jyldan beri dástúrli túrde uiymdastyrylyp kele jatqan baiqaýǵa biyl da qala turǵyndary belsendi qatysty. Almaty boiynsha baiqaýǵa 250-den astam ótinim kelip túsken. Irikteý kezeńinen súrinbei ótken 8 januia finalǵa shyqty.
Final qorytyndysy boiynsha Dúisebaevtar otbasy úzdik atandy. Bul áýlet – pedagogikalyq eńbekpen órilgen januia. Otbasynyń tiregi Ulbolsyn Dúisebaeva 40 jyldan astam ýaqyt boiy ustazdyq etken. Joldasy Ábdikamal Dúisebaev jáne otbasy músheleri de bilim berý salasyna súbeli úles qosyp keledi. Búginde áýlettiń 9 balasy men 3 nemeresi ustazdyq joldy jalǵastyryp júr.
– Allaǵa shúkir, eńbegimiz elenip otyr. Otbasy berik bolýy úshin yntymaq pen syilastyq kerek. Úlkenge qurmet, kishige izet kórsetý – bizdiń basty ustanymymyz, – dedi baiqaý jeńimpazy Ulbolsyn Dúisebaeva.
Saiys barysynda qatysýshylardyń shyǵarmashylyq áleýeti, eńbek jolyndaǵy tabandylyǵy men qoǵamǵa qosqan úlesi jan-jaqty baǵalandy.
– Baiqaýǵa túrli salada eńbek etip júrgen otbasylar qatysty. Arasynda birneshe býynnan turatyn áýletter de bar. Biyl basymdyq jumysshy mamandyq ielerine berildi. Biraq talapqa sai kelý birinshi orynda boldy. Bul baiqaý jyl saiyn jaqsy dástúrge ainalyp keledi, – dedi Almaty qalalyq Qoǵamdyq damý basqarmasynyń basshysy Aidar Esenbekov.
Aita keteiik, qalalyq kezeńde úzdik shyqqan 8 otbasyǵa qarjylai syiaqy tabystaldy. Al Dúisebaevtar áýleti aldaǵy ýaqytta Astanada ótetin respýblikalyq baiqaýda Almaty qalasyn tanystyrady.
