الماتىدا «مەرەيلى وتباسى – 2025» ۇلتتىق بايقاۋىنىڭ قالالىق كەزەڭى ءوز مارەسىنە جەتتى. فينالعا جولداما العان 8 وتباسى اقتىق كەزەڭدە ب ا ق سىناپ، قازىلاردىڭ شەشىمىمەن دۇيسەبايەۆتار اۋلەتى ۇزدىك وتباسى اتاندى. ەندى بۇل اۋلەت ەلوردادا وتەتىن رەسپۋبليكالىق بايقاۋدا الماتى نامىسىن قورعايدى،- دەپ حابارلايدى Dalanews.kz
2014 جىلدان بەرى ءداستۇرلى تۇردە ۇيىمداستىرىلىپ كەلە جاتقان بايقاۋعا بيىل دا قالا تۇرعىندارى بەلسەندى قاتىستى. الماتى بويىنشا بايقاۋعا 250-دەن استام ءوتىنىم كەلىپ تۇسكەن. ىرىكتەۋ كەزەڭىنەن سۇرىنبەي وتكەن 8 جانۇيا فينالعا شىقتى.
فينال قورىتىندىسى بويىنشا دۇيسەبايەۆتار وتباسى ۇزدىك اتاندى. بۇل اۋلەت – پەداگوگيكالىق ەڭبەكپەن ورىلگەن جانۇيا. وتباسىنىڭ تىرەگى ۇلبولسىن دۇيسەبايەۆا 40 جىلدان استام ۋاقىت بويى ۇستازدىق ەتكەن. جولداسى ابدىكامال دۇيسەبايەۆ جانە وتباسى مۇشەلەرى دە ءبىلىم بەرۋ سالاسىنا سۇبەلى ۇلەس قوسىپ كەلەدى. بۇگىندە اۋلەتتىڭ 9 بالاسى مەن 3 نەمەرەسى ۇستازدىق جولدى جالعاستىرىپ ءجۇر.
– اللاعا شۇكىر، ەڭبەگىمىز ەلەنىپ وتىر. وتباسى بەرىك بولۋى ءۇشىن ىنتىماق پەن سىيلاستىق كەرەك. ۇلكەنگە قۇرمەت، كىشىگە ىزەت كورسەتۋ – ءبىزدىڭ باستى ۇستانىمىمىز، – دەدى بايقاۋ جەڭىمپازى ۇلبولسىن دۇيسەبايەۆا.
سايىس بارىسىندا قاتىسۋشىلاردىڭ شىعارماشىلىق الەۋەتى، ەڭبەك جولىنداعى تاباندىلىعى مەن قوعامعا قوسقان ۇلەسى جان-جاقتى باعالاندى.
– بايقاۋعا ءتۇرلى سالادا ەڭبەك ەتىپ جۇرگەن وتباسىلار قاتىستى. اراسىندا بىرنەشە بۋىننان تۇراتىن اۋلەتتەر دە بار. بيىل باسىمدىق جۇمىسشى ماماندىق يەلەرىنە بەرىلدى. ءبىراق تالاپقا ساي كەلۋ ءبىرىنشى ورىندا بولدى. بۇل بايقاۋ جىل سايىن جاقسى داستۇرگە اينالىپ كەلەدى، – دەدى الماتى قالالىق قوعامدىق دامۋ باسقارماسىنىڭ باسشىسى ايدار ەسەنبەكوۆ.
ايتا كەتەيىك، قالالىق كەزەڭدە ۇزدىك شىققان 8 وتباسىعا قارجىلاي سىياقى تابىستالدى. ال دۇيسەبايەۆتار اۋلەتى الداعى ۋاقىتتا استانادا وتەتىن رەسپۋبليكالىق بايقاۋدا الماتى قالاسىن تانىستىرادى.
