Almatyda ál-Farabi dańǵylynda bolǵan adam ólimine ákelgen jol-kólik oqiǵasyna qatysty sot protsesinde qaza tapqan Tomiris Qydyrbektiń ákesi aiyptalýshy Aleksandr Paktan 100 million teńge kóleminde moraldyq ótemaqy talap etti, dep habarlaidy dalanews.kz.
Bul talapty sot otyrysynda marqumnyń ákesiniń múddesin qorǵaityn advokat Meiirman Shekeeva málimdedi. Buǵan deiin, 19 maýsymda Tomiristiń ákesi sotta sóilegen sózinde Aleksandr Pakty keshirmeitinin jáne odan eshqandai aqsha almaitynyn aitqan bolatyn.
Sot Tomiris Qydyrbektiń ákesin is boiynsha jábirlenýshi retinde tanydy. Al marqumnyń anasy buǵan deiin aiyptalýshyny keshirgenin jáne oǵan qatysty eshqandai talaby joq ekenin málimdegen edi.
Eske sala keteiik, Aleksandr Pak Almatydaǵy ál-Farabi dańǵylynda bolǵan jantúrshigerlik jol apatyna bailanysty sot aldynda jaýap berip jatyr. Apat saldarynan úsh adam qaza tapqan. Buǵan deiin ol sotta óz kinásin tolyq moiyndaǵan bolatyn.
