Almatyda buryn memlekettik organdarǵa berilmek bolǵan Lamborghini satylymǵa qaıta shyǵaryldy, dep habarlaıdy Dalanews.kz.

Nege.Aqsha telegram arnasynyń málimetinshe, Almaty qalalyq Memlekettik múlik jáne jekeshelendirý departamenti aýksıon jarıalap, ashyq jasyl tústi Lamborghini Huracan kóligin satylymǵa qoıdy. Bastapqy baǵasy 343,3 mln teńge dep belgilengen.

Aýksıon baǵany tómendetý tásilimen ótedi. Aldymen kólik joǵary baǵamen usynylady, al satyp alýshy tabylmasa, quny kezeń-kezeńimen arzandaı beredi. Satyp alýǵa birinshi bolyp kelisim bergen adam kólikti sol kezdegi baǵamen alady. Eń tómengi shegi - 57,2 mln teńge.

Aıta keteıik, buǵan deıin atalǵan sýperkardy memlekettik zańdy tulǵalardyń balansyna berý josparlanǵan edi. Endi kólik ashyq naryqta satylmaq.