Almatyda "Merkýr Taýers" turǵyn úi kesheniniń kúzetshisin birneshe ret kóligimen qaǵyp, soqqyǵa jyqqan kúdiktige qatysty sot otyrysy bastaldy, dep habarlaidy Dalanews.kz.
Atalǵan is boiynsha sot otyrysy jabyq formatta ótip jatyr. Mundai sheshim kúdiktige áleýmettik jeli arqyly tanysy jaily pornografiialyq mazmundaǵy materialdardy taratty degen qosymsha aiyp taǵylýyna bailanysty qabyldanǵan.
Aita keteiik, buǵan deiin burynǵy depýtattyń ulyna qatysty qylmystyq is Almaty sotynyń qaraýyna jiberilgen edi.
"Almaty Qylmystyq ister jónindegi mamandandyrylǵan aýdanaralyq sotyna Qazaqstan Respýblikasy Qylmystyq kodeksiniń 99-baby 2-bóligi 5) tarmaǵy ("Asa qatygezdikpen jasalǵan adam óltirý") jáne 147-baby 5-bóligi ("Adamnyń jeke ómiri týraly málimetterdi onyń kelisiminsiz taratý") boiynsha sotqa berilgen T.-ǵa qatysty qylmystyq is kelip tústi. Birinshi epizod boiynsha sottalýshy 2024 jyldyń naýryzynda Almatydaǵy turǵyn úi keshenderiniń biriniń kúzetshisin óltirdi dep aiyptalyp otyr", – delingen habarlamada.
Sonymen qatar tergeý sottalýshyǵa óziniń tanysy A.-nyń qatysýymen túsirilgen pornografiialyq beinematerialdardy áleýmettik jeliler arqyly taratty degen aiyp taqqan edi.
Eske salaiyq, ótken jyly naýryzda jol talǵamaityn kóligimen Almatydaǵy "Merkýr Taýers" turǵyn úi kesheniniń kúzetshisin birneshe ret qaǵyp, keiin kóliginen túsip ony soqqyǵa jyqqan er adamnyń áreketi videoǵa túsip qalǵan bolatyn. Kúzetshi aýyr jaǵdaida aýrýhanaǵa jetkizilip, sol jerde kóz jumdy.
