Almaty ákimi Erbolat Dosaev Naýryzbaı aýdanyn aralaý barysynda 1500 oryndyq jaıly mekteptiń qurylysymen tanysty.
Bilim berý mekemesiniń qurylysy ótken jyldyń tamyz aıynda «Jaıly mektep» ulttyq jobasy aıasynda bastaldy. Onda oqytý bir aýysymda ótedi.
Naýryzbaı aýdanynda barlyǵy 12 memlekettik mektep, 16 jekemenshik jáne NZM jumys isteıdi, onda 32 myń bala oqıdy. Halyqtyń ósýi men belsendi turǵyn úı qurylysyn eskere otyryp, oqýshy oryndarynyń tapshylyǵy saqtalýda.
Bıylǵy oqý jylynda osy aýdanda oqýshy oryndarynyń tapshylyǵy 4 myńnan astam oryndy quraıdy. Ol úshin aýdanda 6900 oryndyq jańa mektepterdiń qurylysy myna mekenjaılarda júrgizilýde: «Alem Sıtı» TK, «Alma Sıtı-4» TK, Quramys shaǵyn aýdany jáne Sábdenov kóshesi. Sonymen qatar, ótken jyly Shuǵyla shaǵyn aýdanyndaǵy № 174 mektepke 375 oqýshyǵa arnalǵan qosymsha qurylys bastaldy.
Almaty basshysy jumys sapary barysynda kelesi oqý jylyna qalalyq mektepterdiń bir bóligi bir aýysymdyq oqýǵa aýystyrylatynyn atap ótti.
«2025 jyldyń 1 qyrkúıegine qaraı «Jaıly mektep» jobasyn iske asyrýdyń arqasynda qala boıynsha oqýshy ornynyń tapshylyǵy 30 myńǵa jýyq oqýshy orynǵa azaıady dep josparlanýda. Bolashaqta oqýshylar sanynyń 3-4 myńǵa ósýine oraı jyl saıynǵy tapshylyq qala jańa mektepter, tolyqtyrýlar men rekonstrýksıalar salý arqyly birtindep jabylatyn bolady», - dep atap ótti Erbolat Dosaev.
Nysandy aralap shyqqan qala basshysy barlyq jumystardy belgilengen kestege sáıkes, atap aıtqanda, osy jyldyń sońyna deıin aıaqtaýdy jáne olardyń joǵary sapasyn qamtamasyz etýdi tapsyrdy.
Mektep salýmen qatar, qalalyq mobıldilik basqarmasy mektepke kireberis joldy jáne 70 kólikke arnalǵan parkıngti uıymdastyrýmen de aınalysady. Jyl sońyna deıin uzyndyǵy 605 m. joldyń búkil ýchaskesinde asfáltbeton jabynynyń tómengi qabatyn ornatý boıynsha jumystardy aıaqtaý josparlanýda. Bul jumystardy aıaqtaý osy jyldyń 30 qarashasyna deıin josparlanǵan.
