الماتى اكىمى ەربولات دوسايەۆ ناۋرىزباي اۋدانىن ارالاۋ بارىسىندا 1500 ورىندىق جايلى مەكتەپتىڭ قۇرىلىسىمەن تانىستى.
ءبىلىم بەرۋ مەكەمەسىنىڭ قۇرىلىسى وتكەن جىلدىڭ تامىز ايىندا «جايلى مەكتەپ» ۇلتتىق جوباسى اياسىندا باستالدى. وندا وقىتۋ ءبىر اۋىسىمدا وتەدى.
ناۋرىزباي اۋدانىندا بارلىعى 12 مەملەكەتتىك مەكتەپ، 16 جەكەمەنشىك جانە نزم جۇمىس ىستەيدى، وندا 32 مىڭ بالا وقيدى. حالىقتىڭ ءوسۋى مەن بەلسەندى تۇرعىن ءۇي قۇرىلىسىن ەسكەرە وتىرىپ، وقۋشى ورىندارىنىڭ تاپشىلىعى ساقتالۋدا.
بيىلعى وقۋ جىلىندا وسى اۋداندا وقۋشى ورىندارىنىڭ تاپشىلىعى 4 مىڭنان استام ورىندى قۇرايدى. ول ءۇشىن اۋداندا 6900 ورىندىق جاڭا مەكتەپتەردىڭ قۇرىلىسى مىنا مەكەنجايلاردا جۇرگىزىلۋدە: «الەم سيتي» تك، «الما سيتي-4» تك، قۇرامىس شاعىن اۋدانى جانە سابدەنوۆ كوشەسى. سونىمەن قاتار، وتكەن جىلى شۇعىلا شاعىن اۋدانىنداعى № 174 مەكتەپكە 375 وقۋشىعا ارنالعان قوسىمشا قۇرىلىس باستالدى.
الماتى باسشىسى جۇمىس ساپارى بارىسىندا كەلەسى وقۋ جىلىنا قالالىق مەكتەپتەردىڭ ءبىر بولىگى ءبىر اۋىسىمدىق وقۋعا اۋىستىرىلاتىنىن اتاپ ءوتتى.
«2025 جىلدىڭ 1 قىركۇيەگىنە قاراي «جايلى مەكتەپ» جوباسىن ىسكە اسىرۋدىڭ ارقاسىندا قالا بويىنشا وقۋشى ورنىنىڭ تاپشىلىعى 30 مىڭعا جۋىق وقۋشى ورىنعا ازايادى دەپ جوسپارلانۋدا. بولاشاقتا وقۋشىلار سانىنىڭ 3-4 مىڭعا وسۋىنە وراي جىل سايىنعى تاپشىلىق قالا جاڭا مەكتەپتەر، تولىقتىرۋلار مەن رەكونسترۋكسيالار سالۋ ارقىلى بىرتىندەپ جابىلاتىن بولادى»، - دەپ اتاپ ءوتتى ەربولات دوسايەۆ.
نىساندى ارالاپ شىققان قالا باسشىسى بارلىق جۇمىستاردى بەلگىلەنگەن كەستەگە سايكەس، اتاپ ايتقاندا، وسى جىلدىڭ سوڭىنا دەيىن اياقتاۋدى جانە ولاردىڭ جوعارى ساپاسىن قامتاماسىز ەتۋدى تاپسىردى.
مەكتەپ سالۋمەن قاتار، قالالىق موبيلدىلىك باسقارماسى مەكتەپكە كىرەبەرىس جولدى جانە 70 كولىككە ارنالعان پاركينگتى ۇيىمداستىرۋمەن دە اينالىسادى. جىل سوڭىنا دەيىن ۇزىندىعى 605 م. جولدىڭ بۇكىل ۋچاسكەسىندە اسفالتبەتون جابىنىنىڭ تومەنگى قاباتىن ورناتۋ بويىنشا جۇمىستاردى اياقتاۋ جوسپارلانۋدا. بۇل جۇمىستاردى اياقتاۋ وسى جىلدىڭ 30 قاراشاسىنا دەيىن جوسپارلانعان.
