Almatyda jumbaq jaǵdaida qaza tapqan Aqnár Gúlstannyń anasy áleýmettik jelide prezident Qasym-Jomart Toqaevtan kómek surap, úndeý jasady, dep habarlaidy Dalanews.kz.
"Qurmetti prezident myrza, men Gúlstan Qamit sizge qarapaiym ana, qaiǵydan qan jutqan áiel retinde júginip otyrmyn. Men 2024 jyldyń 20 shildesinde Almaty qalasynda jumbaq jaǵdaida qaza tapqan Aqnár esimdi qyzdyń anasymyn. Qyzym bes tilde erkin sóileitin, KIMEP ýniversitetiniń túlegi. Armany asqaq, bolashaǵynan zor úmit kúttiretin jaryndy jas edi. Ol jetinshi qabattan qulap, kóz jumdy. Biraq dálelder men videomaterialdar onyń bul qadamǵa óz erkimen barmaǵanyn anyq kórsetedi. Denesinde azaptaýdyń aýyr izderi boldy. Telefonynan tabylǵan videolarda qyzymdy uryp-soǵyp, qorlap jatqan sátter beinelengen. Qaýipsizdik kameralarynan alynǵan jazbalarda ony terezeden laqtyryp jibergeni anyq kórinedi. Bul oqiǵadan keiin qyzymnyń barlyq múlki, aqshasy, zattary, tipti kiimderi de joq bolyp shyqty. Onyń janynda bolǵan eki qyz Qytai halyq respýblikasynyń azamattary. Olardyń osy qylmysqa tikelei qatysy bolýy múmkin. Soǵan qaramastan olar bostandyqta júr. Biri tipti elden shyǵyp, qaita oraldy. Endi biri 2025 jyldyń 25 qańtarynda Qazaqstan respýblikasynyń azamattyǵyn aldy. Tergep-tekserý amaldaryn júrgizý barysynda eshqandai bultartpaý sharasy qoldanylǵan joq", - deidi anasy.
Anasy Gúlstan Qamittiń sózinshe, Almaty qalalyq tergeý organdary men prokýratýrasy bul isti jeńil bappen ózine ózi qol jumsaýǵa itermeleý dep baǵalap, shynaiy tergeý júrgizbei otyr.
"Qanshama dálel men kýálik bola tura istiń baǵyty ózgertilmei, kúdiktiler jaýapqa tartylmai keledi. Qurmetti prezident myrza, sizden analyq júrekpen, qaiǵydan qan jylaǵan janaiqaiymmen ádildik izdegen azamat retinde ótinip suraimyn", - deidi Gúlstan Qamit.
Gúlstan Qamit úndeýinde prezidentke birneshe ótinish jasady.
"Birinshiden, Aqnár isi boiynsha tergeýdi qylmystyq kodekstiń 99 jáne 121-baptary boiynsha qaita saralaý týraly nusqaý berýińizdi, ekinshiden, Almatydaǵy tergeý organdaryna senimsizdik bildire otyryp, isti Astana qalasynan arnaiy tergeý tobynyń baqylaýyna tapsyrýyńyzdy suraimyn. Úshinshiden, qyzymnyń ólimine qatysy bar kúdikti tulǵalardy qamaýǵa alýǵa jáne ádil tergeý júrgizýge yqpal etýińizdi suraimyn. Qurmetti prezident myrza, ózińiz aitqandai elde zań ústemdigi ornasa, halyqtyń bilikke degen senimi nyǵaiady degen sózińizge tolyq senemin", - deidi Gúlstan Qamit.
Eske salaiyq, Almatyda 2024 jyly 20 shildede Aqnár Hamit kópqabatty turǵyn úidiń jetinshi qabatynan qulap, qaitys bolǵan. Tergeý bul oqiǵany "ózin-ózi óltirý" babymen tirkegen. Alaida jaqyndary Aqnárdiń jetinshi qabattan qulap ketkenine senbeidi. Olardyń sózinshe, marqum qaza bolǵanǵa deiin denesinde azaptaý belgileri bolǵan.
"Biraq politsiia tergeý kezinde ony is materialdaryna qospaǵan" deidi olar.
