Almatyda Halyqaralyq jastar kúnine arnalǵan «Alma Love» jastar festivali aiasynda «JASTAR JOLY» kvest-oiyny jáne «SOCIAL LAB» áleýmettik jobalar kórmesi syndy eki mańyzdy is-shara uiymdastyryldy. Bul týraly qalalyq Jastar saiasaty basqarmasy málimdedi,- dep habarlaidy Dalanews.kz
Kvest-oiynǵa qatysýǵa 1000-nan astam jas turǵyn ótinish bildirdi. Irikteý kezeńiniń qorytyndysy boiynsha shamamen 40 komanda jarysqa joldama aldy. Bes kezeńnen turǵan kvest barysynda qatysýshylar qalanyń saiabaqtarymen júrip ótip, uiymdastyrýshylardyń tapsyrmalaryn oryndady, Almatynyń tarihy men mádenieti jónindegi suraqtarǵa jaýap berdi jáne interaktivti oiyndarǵa qatysty.
– Bul kvest men úshin qyzyqty ári paidaly tájiribe boldy. Suraqtar ártúrli taqyryptardy qamtydy: keibiri logika men bilimdi, keibiri tez sheshim qabyldaýdy talap etti. Osy oiyn arqyly Almaty jaily kóp jańa málimet bildim, buryn barmaǵan jerlerimdi kórdim. Sondai-aq komandalyq jumystyń mańyzdylyǵyn sezindim jáne jańa adamdarmen tanystym, – dedi joba qatysýshysy Maqsat Saǵdiev.
Tórt kezeńniń nátijesi boiynsha Arbatta ótken grand-finalǵa bes úzdik komanda shyqty. Jeńimpazdar marapattaldy.
Festival aiasyndaǵy taǵy bir mańyzdy shara – «SOCIAL LAB» kórmesi qalanyń eń iri saýda ortalyqtarynyń birinde ótti. Onda 20-dan astam jastar jobasy tanystyryldy: inkliýzivti teatr, volonterlik bastamalar, ashyq aspan astyndaǵy kinopokazdar, tegin oqý kýrstary, «Tilder saiabaǵy» jobasy, profilaktikalyq baǵdarlamalar, sondai-aq jasandy intellekt pen robototehnika baǵytyndaǵy bastamalar.
– Kórmeniń basty maqsaty – áleýmettik mańyzy bar jobalardy turǵyndarǵa tanystyrý jáne olardy qoldaý. Biz jastardyń bastamalaryn iske asyrýǵa jáne olardy qoǵamdyq ómirge belsendi tartýǵa jaǵdai jasaimyz, – dedi Jastar saiasaty basqarmasynyń basshysy Aziz Qajdenbek.
Kórme qala turǵyndary men qonaqtarynyń qyzyǵýshylyǵyn týdyrdy. – Munda kóptegen paidaly ári qyzyqty jobalardy kórdim. Bolashaqta osyndai bastamalarǵa qatysyp, úles qosqym keledi, – dedi jas qatysýshy Ǵani Mamyr.
Aita keteiik, Almatyda 3 tamyzdan bastap Halyqaralyq jastar kúnine arnalǵan onkúndik ótip jatyr. Baǵdarlamada ekologiialyq aktsiialar, sporttyq týrnirler, kvest-oiyndar, Open Mic formatyndaǵy kontsertter jáne basqa da sharalar bar. Festivaldiń saltanatty jabylýy 12 tamyzda Balýan Sholaq atyndaǵy sport kesheninde ótedi. Qonaqtardy qazaqstandyq estrada juldyzdarynyń qatysýymen gala-kontsert jáne Almatynyń belsendi jastaryn marapattaý rásimi kútip tur. Kirý tegin.
