Almaty qalasynda nysanaly jedel-izdestirý is-sharalary barysynda quramynda esirtkisi bar ósimdikterdi ósirýge arnalǵan jasyryn fitozerthananyń qyzmeti toqtatyldy, – dep habarlaidy Dalanews.kz.
Arnaiy operatsiia esirtki qylmysyna qarsy is-qimyl basqarmasynyń qyzmetkerleri men politsiianyń arnaiy jasaǵynyń birlesken jumysy nátijesinde júzege asyryldy.
Jalǵa alynǵan turǵyn úide kannabis tobyna jatatyn ósimdikterdi ósirýge arnalǵan jaryqtandyrý jáne jeldetý júiesimen jabdyqtalǵan arnaiy termopalatkalar ornatylǵany anyqtaldy. Tintý barysynda esirtkisi bar ósimdik butalary, keptirilgen ósimdik tektes zat, tuqymdar, elektrondy tarazylar, oraýǵa arnalǵan materialdary, keptirý jáne ósirý qural-jabdyqtary, sondai-aq ulttyq jáne shetel valiýtasyndaǵy aqsha qarajaty tárkilendi.
Zańsyz óndiristi uiymdastyrdy degen kúdikpen eki er adam ustaldy. Olar ýaqytsha ustaý izoliatoryna qamaldy. Qajetti sot saraptamalary taǵaiyndalyp, sotqa deiingi tergep-tekserý amaldary júrgizilýde.
