Qala kúni qarsańynda Almatyda erekshe bilim berý qajettiligi bar balalarǵa arnalǵan jańa «Januia» mamandandyrylǵan kesheni saltanatty túrde ashyldy. Bul qalanyń infraqurylymyn damytýdaǵy mańyzy zor bastama, dep habarlaidy Dalanews.kz
«Januia» kesheni BI Group kompaniiasy men Almaty ákimdiginiń seriktestigi aiasynda salyndy. Jobanyń jalpy investitsiia kólemi 6 mlrd teńge. Jańa keshen Medeý aýdanynda ornalasqan.
1967 jyly salynǵan eski ǵimarat qaýipsizdik talaptaryna jáne zamanaýi standarttarǵa sai kelmeitin. Al jobada barlyǵy jańadan jasalyp, aýmaq edáýir keńeiip, balalarǵa jaily jaǵdai jasalyp, zamanaýi tehnologiia engizilip otyr.
– Búginde qalanyń infraqurylymy, ásirese bilim berý salasy qarqyndy damyp otyr. Osy oqý jylynda 12 jańa mektep pen innovatsiialyq shyǵarmashylyq ortalyqtary ashyldy. Al «Januia» airyqsha keshen. Munda erekshe kútimdi jáne arnaiy bilim berýdi qajet etetin balalar úshin barlyq múmkindik bar. Oqý, damý jáne áleýmettený úshin jaǵdai jasalǵan, – dedi Almaty qalalyq Bilim basqarmasynyń basshysy Sairan Saifedenov.
Mamandandyrylǵan «Januia» kesheniniń direktory Marina Dáýletbekova mekeme jumysy týraly baiandady.
– Qazirgi tańda bizde 533 bala bilim alyp júr. Onyń ishinde 133 bala úiden oqidy, al 400-i «Januia» kesheninde oqidy. Jarǵyǵa sáikes, biz 4 jastan 18 jasqa deiingi balalardy psihologiialyq-meditsinalyq-pedagogikalyq konsýltatsiia baǵyttamasy sai «Ziiatynda aýytqýy bar» sanaty boiynsha qabyldaimyz. Oqý úderisi birinshi aýysymda ótedi. Tústen keiin mamandandyrylǵan mamandar qabyldaidy, úiirmeler jumys isteidi. Bizde kúnine alty mezgil tamaq beriledi. Sport sektsiialary, horeografiia, shyǵarmashylyq úiirmeler, sheshendik ónerge úiretý sabaqtary bar. Robototehnikany engizý josparlanyp otyr. Barlyq sabaq balalar úshin tegin, – dedi ol.
Keshende logoped, defektolog, psiholog, emdik dene shynyqtyrý kabinetteri, qosymsha bilim berýge arnalǵan sheberhanalar, sondai-aq tuzdy shahta jabdyqtalǵan. Erekshe bilim berý qajettiligi bar balalarǵa arnaiy taktildi jáne túrli-tústi navigatsiialyq júie jasalǵan.
