قالا كۇنى قارساڭىندا الماتىدا ەرەكشە ءبىلىم بەرۋ قاجەتتىلىگى بار بالالارعا ارنالعان جاڭا «جانۇيا» مامانداندىرىلعان كەشەنى سالتاناتتى تۇردە اشىلدى. بۇل قالانىڭ ينفراقۇرىلىمىن دامىتۋداعى ماڭىزى زور باستاما، دەپ حابارلايدى Dalanews.kz
«جانۇيا» كەشەنى BI Group كومپانياسى مەن الماتى اكىمدىگىنىڭ سەرىكتەستىگى اياسىندا سالىندى. جوبانىڭ جالپى ينۆەستيسيا كولەمى 6 ملرد تەڭگە. جاڭا كەشەن مەدەۋ اۋدانىندا ورنالاسقان.
1967 جىلى سالىنعان ەسكى عيمارات قاۋىپسىزدىك تالاپتارىنا جانە زاماناۋي ستاندارتتارعا ساي كەلمەيتىن. ال جوبادا بارلىعى جاڭادان جاسالىپ، اۋماق ەداۋىر كەڭەيىپ، بالالارعا جايلى جاعداي جاسالىپ، زاماناۋي تەحنولوگيا ەنگىزىلىپ وتىر.
– بۇگىندە قالانىڭ ينفراقۇرىلىمى، اسىرەسە ءبىلىم بەرۋ سالاسى قارقىندى دامىپ وتىر. وسى وقۋ جىلىندا 12 جاڭا مەكتەپ پەن يننوۆاسيالىق شىعارماشىلىق ورتالىقتارى اشىلدى. ال «جانۇيا» ايرىقشا كەشەن. مۇندا ەرەكشە كۇتىمدى جانە ارنايى ءبىلىم بەرۋدى قاجەت ەتەتىن بالالار ءۇشىن بارلىق مۇمكىندىك بار. وقۋ، دامۋ جانە الەۋمەتتەنۋ ءۇشىن جاعداي جاسالعان، – دەدى الماتى قالالىق ءبىلىم باسقارماسىنىڭ باسشىسى سايران سايفەدەنوۆ.
مامانداندىرىلعان «جانۇيا» كەشەنىنىڭ ديرەكتورى مارينا داۋلەتبەكوۆا مەكەمە جۇمىسى تۋرالى باياندادى.
– قازىرگى تاڭدا بىزدە 533 بالا ءبىلىم الىپ ءجۇر. ونىڭ ىشىندە 133 بالا ۇيدەن وقيدى، ال 400ء-ى «جانۇيا» كەشەنىندە وقيدى. جارعىعا سايكەس، ءبىز 4 جاستان 18 جاسقا دەيىنگى بالالاردى پسيحولوگيالىق-مەديسينالىق-پەداگوگيكالىق كونسۋلتاسيا باعىتتاماسى ساي «زياتىندا اۋىتقۋى بار» ساناتى بويىنشا قابىلدايمىز. وقۋ ۇدەرىسى ءبىرىنشى اۋىسىمدا وتەدى. تۇستەن كەيىن مامانداندىرىلعان ماماندار قابىلدايدى، ۇيىرمەلەر جۇمىس ىستەيدى. بىزدە كۇنىنە التى مەزگىل تاماق بەرىلەدى. سپورت سەكسيالارى، حورەوگرافيا، شىعارماشىلىق ۇيىرمەلەر، شەشەندىك ونەرگە ۇيرەتۋ ساباقتارى بار. روبوتوتەحنيكانى ەنگىزۋ جوسپارلانىپ وتىر. بارلىق ساباق بالالار ءۇشىن تەگىن، – دەدى ول.
كەشەندە لوگوپەد، دەفەكتولوگ، پسيحولوگ، ەمدىك دەنە شىنىقتىرۋ كابينەتتەرى، قوسىمشا ءبىلىم بەرۋگە ارنالعان شەبەرحانالار، سونداي-اق تۇزدى شاحتا جابدىقتالعان. ەرەكشە ءبىلىم بەرۋ قاجەتتىلىگى بار بالالارعا ارنايى تاكتيلدى جانە ءتۇرلى-تۇستى ناۆيگاسيالىق جۇيە جاسالعان.
