Almaty ákimi Erbolat Dosaev 2024 jyldyń jeltoqsanynda kúrdeli jóndeýden ótken Perinatologiia jáne balalar kardiohirýrgiiasy ortalyǵynyń bazasynda qurylǵan «Qamqorlyq» erte aralasý ortalyǵyna bardy. Jańa ortalyqta damýynda túrli aýytqýy bar jáne shala týǵan balalarǵa keshendi qoldaý kórsetiledi,- dep habarlaidy Dalanews.kz
Almaty ákimdigi men «Qazaqstan halqyna» qory bastamashylyq etken bul biregei joba meditsinalyq kómekten bólek, áleýmettik jáne bilim berý qoldaýyn da qamtidy.
Munda balalardyń úilesimdi ósýi men beiimdelýine jaǵdai jasalǵan. Olarǵa abilitatsiia (jańa daǵdylardy damytý), kognitivti, motorlyq jáne kommýnikativti qabiletin damytýǵa arnalǵan oqytý júrgiziledi.
426 sharshy metr aýmaqta biregei terapevtik keńistikter qarastyrylǵan: shýngit jáne tuzdy bólmeler, sensorlyq qabyldaýdy jaqsartýǵa arnalǵan immersiialyq vanna, sensorlyq bólme bar. Balalardy ońaltýǵa arnalǵan jeke baǵdarlamalardy kóp salaly mamandar toby ázirleidi. Olardyń qataryna nevrolog, reabilitolog, neonatolog, fizioterapevt, EDSh dárigeri, logoped jáne defektolog kiredi.
Ortalyq kúnine 50 bala qabyldaidy, al jylyna 600 balaǵa mindetti áleýmettik meditsinalyq saqtandyrý (MÁMS) aiasynda kómek kórsetiledi.
Erbolat Dosaev ortalyqtaǵy qurylys jumystarynyń nátijelerimen tanysyp, anyqtalǵan kemshilikterdi joiýdy merdigerge tapsyrdy jáne olardyń oryndalýyn baqylaýǵa aldy.
Ákim sondai-aq jańartylǵan Perinatologiia jáne balalar kardiohirýrgiiasy ortalyǵynyń emhanasynyń jumysymen tanysty. 1966 jyly salynǵan 1300,6 sharshy metrlik eki qabatty ǵimaratta kúrdeli jóndeý júrgizilip, injenerlik júieler jańǵyrtyldy. Meditsinalyq qyzmetti jyldam kórsetý úshin patsientterdiń baǵyty ońtailandyrylyp, múmkindigi shekteýli azamattar úshin qoljetimdilik artty. Atap aitqanda, emhananyń keńistigi aimaqtarǵa bólinip, kabinetterdiń ornalasýy qaita qaraldy, bul baspaldaqpen kóterilý nemese lift paidalaný qajettiligin azaitty.
Almaty ákimi erekshe nazar aýdarǵan nysannyń biri – emhana bazasynda ornalasqan Uryq qorǵaý ortalyǵy. Munda týa bitken damý kemistikterin prenataldy diagnostikalaý jáne olardy túzetýge arnalǵan jatyrishilik otasy jasalady. Bul Almaty ákiminiń tapsyrmasymen jáne QR Densaýlyq saqtaý ministrliginiń qoldaýymen 2024 jyldyń 13 maýsymynda iske qosylǵan fetaldy hirýrgiianyń jańashyl jobasy. Jyl saiyn bul ortalyqta 8 myńnan astam júkti áiel ýltradybystyq tekserýden ótedi.
Erbolat Dosaevtyń aitýynsha, Perinatologiia jáne balalar kardiohirýrgiiasy ortalyǵynyń ári qarai damýy josparlanyp otyr. Onyń ishinde «Aqyldy» operatsiialyq bólmeler qurý, jyldyq qabyldaý qýatyn 17 500-den 19 500-ge deiin arttyrý, júrekke jasalatyn hirýrgiialyq otalardy qosqanda, operatsiia túrlerin keńeitý, akýsherlik ota sanyn jylyna 3 500-den 4 500-ge deiin arttyrý.
Qazirgi tańda Perinatologiia jáne balalar kardiohirýrgiiasy ortalyǵy – áielder men balalarǵa tolyq tsikldi meditsinalyq qyzmet kórsetetin iri klaster. Onyń ári qarai jańǵyrtylýy jatyrishilik otasyn keńeitýge múmkindik beredi, sondai-aq damý kemistikterinen bolatyn múgedektik pen náreste ólimin 35%-ǵa tómendetýge yqpal etedi.
Aita keteiik, Perinatologiia jáne balalar kardiohirýrgiiasy ortalyǵynda júrgizilgen kúrdeli jóndeý jumystary – «Almaty qalasyn 2025 jylǵa deiin damytý baǵdarlamasy jáne 2030 jylǵa deiingi orta merzimdi perspektiva» aiasyndaǵy mańyzdy kezeńderdiń biri. Ǵimarattyń jalpy aýdany – 24,1 myń sharshy metr.
