Almaty qalasy Áýezov aýdandyq politsiia bóliminiń aǵa detektivi Aslan Álserovtiń ólimine qatysty jańa málimetter jariialandy. Buǵan deiin Almaty oblysynda órtengen kúii tabylǵan politseidiń qazasy qoǵamda úlken rezonans týdyrǵan edi, dep habarlaidy dalanews.kz.
"Vremia" basylymynyń dereginshe, oqiǵa politsiia kúni qarsańynda bolǵan. Marqum sol kúni jumystan úiine kesh oralǵan. Onyń ishimdik ishken-ishpegeni ázirge naqty anyqtalǵan joq. Aldyn ala málimet boiynsha, úide ustara júzine bailanysty daý shyqqan. Basynda aýyzsha bastalǵan janjal keiin tóbeleske ulasqan bolýy múmkin.
Marqumnyń jubaiy da buryn politsiia salasynda qyzmet etkeni aitylady. Basylym málimetinshe, áriptesteri arasynda Aslan Álserovtiń áieline birneshe ret qol kótergeni týraly áńgime taraǵan. Áieldiń jumysqa denesinde soqqy izderimen kelgen kezderi bolǵany da aitylyp otyr. Alaida bul derekterge qatysty ázirge resmi málimdeme jasalǵan joq.
Sol túni úidegi aiqaidan keiin áieldiń 15 jastaǵy eki uly men olardyń 14 jastaǵy dosy oqiǵa ornyna kelgeni habarlandy. Aldyn ala boljam boiynsha, jasóspirimderdiń biri ákesiniń basynan qatty zatpen urǵan bolýy múmkin. Tergeý onyń naqty qandai zatpen soqqy alǵanyn anyqtap jatyr.
Kei derekke súiensek, es-tússiz jatqan er adam keiin kiimmen bailanǵan. Artynsha kúdiktiler onyń denesin kópqabatty úidiń janyndaǵy kólikke aparǵan bolýy múmkin. Máiit kórpege nemese jaimaǵa oralǵan degen boljam bar.
Tańǵa jýyq kólik Almaty oblysy Kegen aýdany baǵytyndaǵy aýyldardyń birinen ótken. Keiin Kókpek–Kóktal–Kegen tas jolynan taýǵa qarai shamamen jarty shaqyrym júrgennen keiin marqumnyń denesi órtelgeni aitylady.
Politseidiń súiegin taýǵa joǵalǵan malyn izdep shyqqan jergilikti shopan taýyp alyp, quqyq qorǵaý organdaryna habarlaǵan.
Qazir tergeý qylmystyń mán-jaiyn tolyq anyqtaý úshin birqatar sot-meditsinalyq saraptama taǵaiyndamaq. Sondai-aq erli-zaiyptylardyń uialy telefondary da tekseriledi.
Aldyn ala málimet boiynsha, Arailym Álserova, onyń eki uly jáne 14 jastaǵy jasóspirim ýaqytsha ustaý izoliatoryna qamalǵan. Olardyń kináni moiyndaǵany aitylǵanymen, bul jóninde resmi aqparat ázirge jariialanǵan joq. Kúdiktilerdiń kinási sotta dáleldenbeiinshe, olar kinásiz dep sanalady.
Aslan Álserov politsiia qyzmetine shamamen 10 jyl buryn kelgen. Ol buǵan deiin arnaiy jedel áreket etý bóliminde qyzmet atqaryp, byltyr tamyz aiynda Almaty qalasy Áýezov aýdany qylmystyq politsiia bóliminiń aǵa detektivi bolyp taǵaiyndalǵan.
