Almaty qalasynyń tsirk arenasynda jylqynyń tynysh tynysy men balanyń ishki alańyn bir arnaǵa toǵystyrǵan bir erekshe sát ótti. Bul joly sahnadaǵy triýktar emes, qarapaiym senim men seriktestik basty nazarda boldy. Qazaq memlekettik tsirkiniń alańynda erekshe qajettiligi bar balalar – tserebraldy sal aýrýy, Daýn sindromy men aýtizm diagnozy qoiylǵan búldirshinder Almaty qalasy Mádeniet basqarmasynyń qoldaýymen ippoterapiia kýrsyna tegin qatysý múmkindigine ie boldy.
Jai ǵana jylqyǵa minip, sheńberdi ainalyp ótý emes – bul balalar úshin ishki senimdi oiatatyn, ózin ózgeden kem kórmeýge jeteleitin naǵyz alǵashqy qadamdardyń biri. Kóbine syrtqy álemmen bailanys ornatý qiynǵa soǵatyn balalar úshin bul ádis tynysh ári naqty yqpal beredi. Ippoterapiia degenimiz – ǵylymi turǵydan dáleldengen ońaltý tásili, ol qimyl-qozǵalysty jetildirýge, dene úilesimdiligin arttyrýǵa, zeiin men senimdilikti qalyptastyrýǵa baǵyttalǵan.
Nomad Stunts komandasynyń kásibi mamandary jattyǵýdy arnaiy úiretilgen jýas jylqylarmen ótkizdi. Komandanyń jetekshisi Qanatbek Kúnǵojinov bul jobanyń mánin qysqa ǵana aityp ótti: “Jylqy balanyń ishki álemin sezedi. Ol úshin – serik, dos. Biz ár balaǵa óz múmkindigine senýge múmkindik bergimiz keledi. Tsirk tek shoý emes, adamdarǵa, ásirese balalarǵa, shyn kóńilmen kómektesetin oryn bolýy kerek.”
Jeti jastaǵy Álim osy ippoterapiiaǵa alǵash qatysqan búldirshinderdiń biri. Anasy Merýert Sársenǵalieva ulynyń emotsiiasyn alǵash ret anyq sezgen sátin tebirene jetkizdi. “Álim adamdarmen aralasýǵa qinalatyn. Biraq osy seans kezinde ol jylqyǵa qýana otyryp minip, birneshe ainalymdy senimdi túrde jasady. Onyń kúlkisi men júzine jaiylǵan jaryq men úshin eń úlken kórsetkish. Bul – bizdiń uzaq úmitimizdiń naqty nátijesi”, – deidi ol.
Tsirktiń bul bastamasy – jalǵyz aktsiia emes. Ippoterapiia sabaqtaryna balalar “ARDI” qoǵamdyq birlestigi men áleýmettik qyzmet kórsetý ortalyqtary arqyly shaqyrylyp otyr. Búginde Qazaq memlekettik tsirkiniń bazasynda osyndai kýrsqa 40-qa jýyq bala qatysyp úlgerdi.
Qoǵamnyń eń názik múshelerine – erekshe balalaryna – osyndai meiirimdi orta men jańa serpilis syilaý bizdiń ortaq jaýapkershiligimiz ekenin Almatydaǵy osy mysal taǵy bir márte eske salyp ótti. Shattyq pen senimdi birge oiatqan bul jobalar jalǵasyn tabýy tiis. Sebebi árbir bala – úlken úmittiń iesi.
