الماتى قالاسىنىڭ سيرك ارەناسىندا جىلقىنىڭ تىنىش تىنىسى مەن بالانىڭ ىشكى الاڭىن ءبىر ارناعا توعىستىرعان ءبىر ەرەكشە ءسات ءوتتى. بۇل جولى ساحناداعى تريۋكتار ەمەس، قاراپايىم سەنىم مەن سەرىكتەستىك باستى نازاردا بولدى. قازاق مەملەكەتتىك سيركىنىڭ الاڭىندا ەرەكشە قاجەتتىلىگى بار بالالار – سەرەبرالدى سال اۋرۋى، داۋن سيندرومى مەن اۋتيزم دياگنوزى قويىلعان بۇلدىرشىندەر الماتى قالاسى مادەنيەت باسقارماسىنىڭ قولداۋىمەن يپپوتەراپيا كۋرسىنا تەگىن قاتىسۋ مۇمكىندىگىنە يە بولدى.
جاي عانا جىلقىعا ءمىنىپ، شەڭبەردى اينالىپ ءوتۋ ەمەس – بۇل بالالار ءۇشىن ىشكى سەنىمدى وياتاتىن، ءوزىن وزگەدەن كەم كورمەۋگە جەتەلەيتىن ناعىز العاشقى قادامداردىڭ ءبىرى. كوبىنە سىرتقى الەممەن بايلانىس ورناتۋ قيىنعا سوعاتىن بالالار ءۇشىن بۇل ءادىس تىنىش ءارى ناقتى ىقپال بەرەدى. يپپوتەراپيا دەگەنىمىز – عىلىمي تۇرعىدان دالەلدەنگەن وڭالتۋ ءتاسىلى، ول قيمىل-قوزعالىستى جەتىلدىرۋگە، دەنە ۇيلەسىمدىلىگىن ارتتىرۋعا، زەيىن مەن سەنىمدىلىكتى قالىپتاستىرۋعا باعىتتالعان.
Nomad Stunts كومانداسىنىڭ كاسىبي ماماندارى جاتتىعۋدى ارنايى ۇيرەتىلگەن جۋاس جىلقىلارمەن وتكىزدى. كوماندانىڭ جەتەكشىسى قاناتبەك كۇنعوجينوۆ بۇل جوبانىڭ ءمانىن قىسقا عانا ايتىپ ءوتتى: “جىلقى بالانىڭ ىشكى الەمىن سەزەدى. ول ءۇشىن – سەرىك، دوس. ءبىز ءار بالاعا ءوز مۇمكىندىگىنە سەنۋگە مۇمكىندىك بەرگىمىز كەلەدى. سيرك تەك شوۋ ەمەس، ادامدارعا، اسىرەسە بالالارعا، شىن كوڭىلمەن كومەكتەسەتىن ورىن بولۋى كەرەك.”
جەتى جاستاعى ءالىم وسى يپپوتەراپياعا العاش قاتىسقان بۇلدىرشىندەردىڭ ءبىرى. اناسى مەرۋەرت سارسەنعالييەۆا ۇلىنىڭ ەموسياسىن العاش رەت انىق سەزگەن ءساتىن تەبىرەنە جەتكىزدى. “ءالىم ادامدارمەن ارالاسۋعا قينالاتىن. ءبىراق وسى سەانس كەزىندە ول جىلقىعا قۋانا وتىرىپ ءمىنىپ، بىرنەشە اينالىمدى سەنىمدى تۇردە جاسادى. ونىڭ كۇلكىسى مەن جۇزىنە جايىلعان جارىق مەن ءۇشىن ەڭ ۇلكەن كورسەتكىش. بۇل – ءبىزدىڭ ۇزاق ءۇمىتىمىزدىڭ ناقتى ناتيجەسى”، – دەيدى ول.
سيركتىڭ بۇل باستاماسى – جالعىز اكسيا ەمەس. يپپوتەراپيا ساباقتارىنا بالالار “اردي” قوعامدىق بىرلەستىگى مەن الەۋمەتتىك قىزمەت كورسەتۋ ورتالىقتارى ارقىلى شاقىرىلىپ وتىر. بۇگىندە قازاق مەملەكەتتىك سيركىنىڭ بازاسىندا وسىنداي كۋرسقا 40-قا جۋىق بالا قاتىسىپ ۇلگەردى.
قوعامنىڭ ەڭ نازىك مۇشەلەرىنە – ەرەكشە بالالارىنا – وسىنداي مەيىرىمدى ورتا مەن جاڭا سەرپىلىس سىيلاۋ ءبىزدىڭ ورتاق جاۋاپكەرشىلىگىمىز ەكەنىن الماتىداعى وسى مىسال تاعى ءبىر مارتە ەسكە سالىپ ءوتتى. شاتتىق پەن سەنىمدى بىرگە وياتقان بۇل جوبالار جالعاسىن تابۋى ءتيىس. سەبەبى ءاربىر بالا – ۇلكەن ءۇمىتتىڭ يەسى.
