Almaty qalasy ákimi Erbolat Dosaev Áýezov aýdanynda jumys sapary barysynda Mamyr-4 shaǵyn aýdanyndaǵy injenerlik jelilerdiń qurylysy barysymen tanysty.
Bul shaǵyn aýdanda jańǵyrtýǵa deiin turǵyndar 1980-1990 jyldary salynǵan jeliler paidalanyp kelgen, olar 90% tozǵan. Biylǵy tamyz aiynda qala ákiminiń tapsyrmasymen Mamyr-4 shaǵyn aýdanynda sýmen jabdyqtaý jáne sý burý jelilerin salý jumystary bastaldy.
Jalpy uzyndyǵy – 12,3 km: sýmen jabdyqtaý jelileri – 6,5 km, sý burý jelileri – 5,8 km. Injenerlik jelilerdiń qurylysy biyl osy shaǵyn aýdandaǵy 14 ótpeli jolda ótedi.
Qazirgi tańda sý burý jelisiniń 2 km jáne sýmen jabdyqtaý jelisiniń 1,5 km salynǵan. Joba 750-den astam turǵyny bar 197 úidi qamtidy. Qurylysty kelesi jyldyń tamyz aiynda aiaqtaý josparlanǵan.
2025 jyly taǵy 4 kóshede – Abai dańǵyly, Momyshuly, Sain jáne Mustai Kárim kóshelerinde jelilerdi salý josparlanýda.
Erbolat Dosaev Áýezov aýdanynyń ákimine Mamyr-4 shaǵyn aýdanynda injenerlik jelilerdi salý jumystaryn sapaly jáne belgilengen kestege sai aiaqtaýdy tapsyrdy. Qala basshysy barlyq úidi jańa jelilerge ýaqytyly qosý jáne turǵyndardyń ómir súrý sapasyn jaqsartý qajettigin atady.
Aita keteiik, Almatyda injenerlik infraqurylymdy jańǵyrtý belsendi túrde júrgizilýde. Biylǵy jyldyń 9 aiynda 219 km jańa sýmen jabdyqtaý jáne sý burý jelileri salyndy, 27,3 km qoldanystaǵy jeliler jańǵyrtyldy. 2025 jyly taǵy 240 km jeli salý jáne 48 km jelini jańǵyrtý josparlanǵan.
Osylaisha, qabyldanǵan sharalar kesheni arqasynda shamamen 100 myń qala turǵyny úshin injenerlik jelilerdiń joǵary tozýyna bailanysty sýmen jabdyqtaý jáne sý burýdyń kópjyldyq máselesi sheshiledi.
