Qazaqstanda inkliýzivti bilim berý salasyndaǵy jańa tsifrlyq resýrs – «e-Ymdaý» ymdaý tili videosózdigi resmi túrde iske qosyldy, dep habarlaidy dalanews.kz.
Joba estý qabileti buzylǵan balalar men eresekterdiń bilim alý, qarym-qatynas jasaý jáne qoǵam ómirine belsendi qatysý múmkindikterin keńeitýge baǵyttalǵan.
Bastama QR Oqý-aǵartý ministrliginiń Mektepke deiingi jáne orta bilim berý komiteti men Arnaiy jáne inkliýzivti bilim berýdi damytýdyń ulttyq ǵylymi-praktikalyq ortalyǵynyń ǵylymi-ádistemelik keńesiniń qoldaýymen júzege asyryldy.
Jobanyń basty ereksheligi – sózder men uǵymdar ym-ishara arqyly beine formatta usynylǵan interaktivti aqparattyq baza. Avtomattandyrylǵan izdeý júiesiniń kómegimen paidalanýshylar qajetti sózdi jyldam taýyp, onyń ymdaý tilindegi durys oryndalý úlgisin kóre alady.
Resýrs qazaq jáne orys tilderinde qoljetimdi.
Videosózdikti App Store arqyly júktep alýǵa nemese Arnaiy jáne inkliýzivti bilim berýdi damytýdyń ulttyq ǵylymi-praktikalyq ortalyǵynyń resmi saity arqyly onlain paidalanýǵa bolady.
«e-Ymdaý» videosózdigi 21 leksikalyq taqyrypty qamtidy.
Joba estý qabileti buzylǵan azamattardyń aqparatqa qoljetimdiligin arttyrýǵa, ymdaý tilin úirenýdi jeńildetýge jáne inkliýzivti bilim berý sapasyn jaqsartýǵa baǵyttalǵan.
Mamandardyń aitýynsha, jańa tsifrlyq resýrs erekshe bilim berý qajettilikteri bar azamattardyń sapaly bilim alýyna jáne qoǵam ómirine tolyqqandy qatysýyna qosymsha múmkindik beredi.
