الماتى قالاسى اكىمى ەربولات دوسايەۆ اۋەزوۆ اۋدانىندا جۇمىس ساپارى بارىسىندا مامىر-4 شاعىن اۋدانىنداعى ينجەنەرلىك جەلىلەردىڭ قۇرىلىسى بارىسىمەن تانىستى.

بۇل شاعىن اۋداندا جاڭعىرتۋعا دەيىن تۇرعىندار 1980-1990 جىلدارى سالىنعان جەلىلەر پايدالانىپ كەلگەن، ولار 90% توزعان. بيىلعى تامىز ايىندا قالا اكىمىنىڭ تاپسىرماسىمەن مامىر-4 شاعىن اۋدانىندا سۋمەن جابدىقتاۋ جانە سۋ بۇرۋ جەلىلەرىن سالۋ جۇمىستارى باستالدى.

جالپى ۇزىندىعى – 12،3 كم: سۋمەن جابدىقتاۋ جەلىلەرى – 6،5 كم، سۋ بۇرۋ جەلىلەرى – 5،8 كم. ينجەنەرلىك جەلىلەردىڭ قۇرىلىسى بيىل وسى شاعىن اۋدانداعى 14 وتپەلى جولدا وتەدى.

قازىرگى تاڭدا سۋ بۇرۋ جەلىسىنىڭ 2 كم جانە سۋمەن جابدىقتاۋ جەلىسىنىڭ 1،5 كم سالىنعان. جوبا 750-دەن استام تۇرعىنى بار 197 ءۇيدى قامتيدى. قۇرىلىستى كەلەسى جىلدىڭ تامىز ايىندا اياقتاۋ جوسپارلانعان.

2025 جىلى تاعى 4 كوشەدە – اباي داڭعىلى، مومىش ۇلى، ساين جانە مۇستاي كارىم كوشەلەرىندە جەلىلەردى سالۋ جوسپارلانۋدا.

ەربولات دوسايەۆ اۋەزوۆ اۋدانىنىڭ اكىمىنە مامىر-4 شاعىن اۋدانىندا ينجەنەرلىك جەلىلەردى سالۋ جۇمىستارىن ساپالى جانە بەلگىلەنگەن كەستەگە ساي اياقتاۋدى تاپسىردى. قالا باسشىسى بارلىق ءۇيدى جاڭا جەلىلەرگە ۋاقىتىلى قوسۋ جانە تۇرعىنداردىڭ ءومىر ءسۇرۋ ساپاسىن جاقسارتۋ قاجەتتىگىن اتادى.

ايتا كەتەيىك، الماتىدا ينجەنەرلىك ينفراقۇرىلىمدى جاڭعىرتۋ بەلسەندى تۇردە جۇرگىزىلۋدە. بيىلعى جىلدىڭ 9 ايىندا 219 كم جاڭا سۋمەن جابدىقتاۋ جانە سۋ بۇرۋ جەلىلەرى سالىندى، 27،3 كم قولدانىستاعى جەلىلەر جاڭعىرتىلدى. 2025 جىلى تاعى 240 كم جەلى سالۋ جانە 48 كم جەلىنى جاڭعىرتۋ جوسپارلانعان.

وسىلايشا، قابىلدانعان شارالار كەشەنى ارقاسىندا شامامەن 100 مىڭ قالا تۇرعىنى ءۇشىن ينجەنەرلىك جەلىلەردىڭ جوعارى توزۋىنا بايلانىستى سۋمەن جابدىقتاۋ جانە سۋ بۇرۋدىڭ كوپجىلدىق ماسەلەسى شەشىلەدى.