Ile aýdany aýmaǵynda «ECOBUS QK» JShS, «Gold Terra Expedition» JShS, sondai-aq jekelegen jeke tulǵalardyń menshigindegi birqatar jer telimderinde uzaq ýaqyt boiy qurylys jáne turmystyq qaldyqtardy zańsyz tastaý faktileri tirkelip keledi, dep habarlaidy dalanews.kz.
Atalǵan máselege bailanysty jaqyn mańdaǵy eldi meken turǵyndary jergilikti atqarýshy organdarǵa birneshe ret júgingen. Turǵyndar aýmaqtyń sanitarlyq jaǵdaiyna jáne stihiialyq qoqys oryndarynyń qorshaǵan ortaǵa keri áserine alańdaýshylyq bildirýde.
Jer telimderin tiisti sanitarlyq jaǵdaida ustaý – menshik ieleri men jer paidalanýshylarynyń mindeti bolǵanyna qaramastan, Ótegen batyr aýyldyq okrýgi ákimdigi tarapynan saldaryn joiý boiynsha birneshe ret sharalar qabyldandy. Sońǵy ýaqytta arnaiy tehnikanyń kómegimen aýmaqty tazalaý jáne qoqysty shyǵarý jumystary keminde úsh márte uiymdastyryldy.
Sonymen qatar, jer telimderiniń menshik ielerine stihiialyq qoqys oryndaryn joiý jáne aýmaqtardy jer, ekologiialyq jáne sanitarlyq zańnama talaptaryna sáikestendirý qajettigi týraly resmi habarlamalar joldandy. Budan bólek, tiisti materialdar Almaty oblysynyń Ekologiia departamentine, Almaty oblysynyń Jer resýrstaryn basqarý departamentine, prokýratýra jáne politsiia organdaryna tekserý júrgizý jáne óz quzyreti sheginde sharalar qabyldaý úshin joldandy.
Qazirgi ýaqytta ýákiletti memlekettik organdarmen birlesip qosymsha baqylaý tetikteri pysyqtalýda. Atap aitqanda, stihiialyq qoqys oryndary jii paida bolatyn aýmaqtar men kireberis joldarǵa beinebaqylaý quraldaryn ornatý máselesi qarastyrylyp jatyr.
Almaty oblysy turǵyn úi-kommýnaldyq sharýashylyq jáne abattandyrý basqarmasynyń basshysy Dimash Qojabekovtiń aitýynsha, negizgi maqsat – tek saldaryn joiý emes, óz jer telimderin kútip-ustaý boiynsha shara qabyldamaityn menshik ieleriniń, sondai-aq qaldyqtardy zańsyz tógetin tulǵalardyń jaýapkershiligin qamtamasyz etý.
«Biz barlyq qajetti materialdardy quzyrly organdarǵa joldadyq. Jer telimderiniń qoqysqa tolýyna jol bergen tulǵalardy jaýapkershilikke tartýǵa kúsh salamyz. Ár adam qorshaǵan ortaǵa janashyrlyqpen qarap, eń aldymen ózinen bastaýy kerek. Bul turǵyndarǵa da, jeke uiymdarǵa da qatysty. Biz osy máseleni «Taza Qazaqstan» baǵdarlamasy aiasynda turaqty túrde kóterip kelemiz», – dedi Dimash Qojabekov.
Árbir anyqtalǵan quqyq buzýshylyq faktisine quqyqtyq baǵa beriledi. Tekserý qorytyndysy boiynsha kináli tulǵalarǵa zańnamada kózdelgen jaýapkershilik sharalary qoldanylady.
