Pavlodar oblysynda kópqabatty turǵyn úidiń úshinshi qabatyndaǵy terezeden qulaǵan úsh jasar bala operatsiia kezinde qaitys boldy, dep habarlaidy dalanews.kz.
Oblystyq densaýlyq saqtaý basqarmasynyń málimetinshe, dárigerlerdiń barlyq kúsh-jigerine qaramastan, balanyń ómirin saqtap qalý múmkin bolmaǵan.
«Ókinishke qarai, biiktikten qulaǵannan keiin Aqsý qalasynan jetkizilgen bala operatsiia kezinde kóz jumdy. Alǵan jaraqattary óte aýyr bolyp, ómirmen úilespedi», – dep habarlady vedomstvodan.
Eske salsaq, 2023 jyly týǵan bala turǵyn úidiń úshinshi qabatyndaǵy terezeden qulap ketken. Ol bastapqyda Aqsý qalalyq aýrýhanasynyń jansaqtaý bólimine asa aýyr jaǵdaida jetkizilgen.
Keiin zardap shekken bala Pavlodar oblystyq balalar aýrýhanasyna tasymaldanǵan bolatyn.
Dárigerler shuǵyl operatsiia jasap, balanyń ómirin saqtap qalýǵa tyrysqanymen, ol ota kezinde kóz jumdy.
Densaýlyq saqtaý basqarmasynyń málimetinshe, jyl basynan beri Pavlodar oblysynda balalardyń terezeden qulaýyna bailanysty úsh jaǵdai tirkelgen.
