Jetisý oblysynyń Tekeli qalasynda eń uzyn kóshe – Qonaev kóshesiniń jóndeý jumystary aiaqtaldy. Atap aitqanda, bul kósheniń 19 shaqyrymy jańardy. Tekelige barǵan jumys sapary barysynda oblys ákimi Beibit Isabaev atalǵan joldyń sapasymen tanysty, dep habarlaidy dalanews.kz.
Eske salsaq, Qonaev kóshesi jolyndaǵy qurylys jumystary turǵyndardyń ótinishi boiynsha ótken jyldyń sáýir aiynda bastalǵan bolatyn.
Qala ákimi Almas Ádildiń aitýynsha, jóndeý biylǵy 1 maýsymda aiaqtaldy. Iaǵni kósheniń 6 shaqyrymyna kúrdeli, 13 shaqyrymyna ortasha jóndeý júrgizildi. Byltyr qala boiynsha 21 kóshege jaryqtandyrý tirekteri ornatylsa, sol qatarda Qonaev kóshesine kóshe jaryǵy qoiyldy.
Beibit Isabaev joldyń jóndeý jumystarynyń nátijesimen tanysyp, «Jol aktivteri sapasynyń ulttyq ortalyǵy» mekemesiniń ókilderine nysandy qabyldaý alý aldynda jol sapasyna tekserý jumystaryn tiisti deńgeide júrgizýdi tapsyrdy.
Qaladaǵy qoǵam belsendileri de jol infraqurylymyn damytý jumystarynyń barysynan habardar ekendikterin jetkizdi:
- Bul - 38 shaqyrymǵa sozylatyn eń negizgi kóshe. Uzaq jyldardan beri turǵyndar osy kósheni jóndeý qajettigi týraly máseleni kóterip keldi. Halyqtyń tilegi eskerilip, ótken jyldan bastap qalamyzdyń kireberisinen jańa kópirge deiingi bóligine kúrdeli jóndeý, kópirden 2-shi kordonǵa deiin ortasha jóndeý júrgizildi. Jol jóndeý kezinde ýaqytsha qolaisyzdar bolýy zańdy, búgingi kúni qurylys jumystary aiaqtaldy, nátijesin kórip otyrmyz. Qazir turǵyndar da, týrister de riza. Oǵan qosa qalada jaiaý júrgishiler joldary tóselip, qolaily jaǵdai jasalýda, - dedi Elena Moiseeva.
Atap ótsek, sońǵy jyldary oblystaǵy respýblikalyq mańyzy bar joldar 100% jóndeldi. Oǵan qosa qolǵa alynǵan jobalardyń arqasynda biylǵy jyldyń sońyna qarai oblystyq mańyzy bar joldardyń jaqsy jaǵdaidaǵy úlesi 96%-ǵa jetedi. Bul – respýblikadaǵy joǵary kórsetkishterdiń biri. Sondai-aq biyl jergilikti joldardy jóndeýge de qomaqty qarjy qarastyryldy.
