Almatyda burynǵy shirkeý qyzmetkeri Iakov Vorontsovtyń ustalǵany týraly aqparat tarady. Bul jaiynda jýrnalist Daniiar Moldabekov málimdedi, dep habarlaidy Dalanews.kz.
Onyń aitýynsha, túnde Vorontsovtyń úiine quqyq qorǵaý organdary kirip, tintý júrgizgen. Keiin ol Almaty qalalyq Politsiia departamentiniń ýaqytsha ustaý izoliatoryna (IVS) jetkizilgen. Jýrnalist istiń mán-jaiy týraly qosymsha aqparat keiinirek habarlanatynyn aitty.
Aita keteiik, Iakov Vorontsov qoǵamda rezonans týdyrǵan málimdemelerimen belgili. Ol Resei pravoslav shirkeýin (RPTs), Kreml saiasatyn synǵa alyp, Ýkrainadaǵy soǵysqa qarsy pikir bildirgen.
2023 jyly ol shirkeýdegi qyzmetin toqtatqan. Keiin Qazaqstanda Máskeý patriarhatyna táýelsiz shirkeý qurýǵa talpynys jasaǵan. 12 aqpanda ol Almaty qalasynyń Ádilet departamenti men Ádilet ministrligin sotqa berip, dini birlestikti tirkeýden bas tartýdy zańsyz dep tanýdy talap etkeni habarlanǵan.
Eske salaiyq, buǵan deiin Reseidiń Ýkrainaǵa basqynshylyǵyn ashyq synǵa alǵan dini qyzmetker Iakov Vorontsov politsiiaǵa shaqyrtylyp, ústinen qylmystyq is qozǵalǵan edi. Ol bul oqiǵanyń artynda Reseidiń arnaiy qyzmetiniń yqpaly bolýy múmkin ekenin málimdegen.
Vorontsovtyń aitýynsha, 2023 jyly 2 tamyzda jazǵan áleýmettik jelidegi jazbasyna bailanysty belgisiz bireý eOtinish platformasy arqyly aryz túsirgen. Jazbasynda ol orys fashizmi men RPTs týraly syni pikir bildirgenin aitady. Osyǵan bailanysty politsiia qyzmetkerleri oǵan QR Qylmystyq kodeksiniń 174-baby – “Áleýmettik, ulttyq, rýlyq, násildik nemese dini arazdyqty qozdyrý” boiynsha túsinikteme berýdi talap etken.
“Men óz pikirimnen bas tartpaimyn. Arazdyq nemese óshpendilik týǵyzý oiymda bolǵan joq. Qaita barsha halyqqa beibit ómir men tatýlyq tileimin. Pikirim úshin jaýap berýge daiynmyn”, – dep jazdy ol Facebook paraqshasynda.
Vorontsov túsinikteme berýden alǵashynda bas tartqanyn aitady. Alaida politsiia qyzmetkerleri eger ol jazbasha túsinikteme bermese, onyń jazbasyna lingvistikalyq saraptama jasalatynyn, bul saraptama 174-bap boiynsha is qozǵaýǵa negiz bolýy múmkin ekenin eskertken.
Aita keteiik, Iakov Vorontsov - qazaq tilinde dini qyzmet atqarǵan tuńǵysh orys pravoslav shirkeýiniń ókili. Resei soǵysty bastaǵannan keiin ol agressiiany aiyptap, Qazaqstandy UQShU quramynan shyǵýǵa shaqyrǵan. Sonymen qatar, Máskeý patriarhatyna baǵynatyn qazaqstandyq shirkeýlerdiń táýelsizdigin talap etip, RPTs-degi ierarhiialyq basqarý júiesin qatty synǵa alǵan.
2024 jyldyń maýsymynda Vorontsov resmi túrde shirkeýdegi qyzmetin toqtatqan. Onyń sózinshe, sońǵy bir jylda Qazaqstan mitropolit okrýgynyń basshylyǵy ony baqylaýda ustaýǵa tyrysyp kelgen.
