Bos jer infraqurylym nysanyna ainalyp, Almatynyń ońtústik bóligindegi qoǵamdyq keńistikterge mańyzdy oryn bolady. Qurylys jumystary biyl 10 qarashada bastaldy.
Aýmaqty abattandyrýda qoǵamdyq tyńdaý men jobany talqylaý barysynda aitylǵan dúnieler eskerilgen. Munda oiyn alańy, fýtbol jáne basketbol alańy, skeitpark, sonymen qatar itpen serýendeýge arnalǵan oryn bolady. Sonymen qatar oryndyq, qoqys jáshikteri men pergolalar qoiylmaqshy. Aǵashtar otyrǵyzyp, sýarý júiesimen qamtylady. Aýmaqty abattandyrý jumystary áleýmettik jaýapkershilik aiasynda júrgiziledi.
Bostandyq aýdanynyń ákimi Sanjar Alin qala basshysyna aǵashtardyń sanitarlyq maqsatta butaqtary kesilgenin, aǵash otyrǵyzyp, fýtbol alańy jóndelgeni týraly esep berdi. Qazirgi ýaqytta jumystyń 15% aiaqtalǵan. Jobany 2024 jyldyń tamyzyna deiin aiaqtaý josparlanyp otyr.
Erbolat Dosaev aimaqtardy bólýdi eskerip, bos ýaqyt pen demalys alańdaryn qaita qurýdy, qarttar men balalar úshin olardy abattandyrý, shatyrlar jasaýdy tapsyryldy.
Jańa qoǵamdyq aýmaqtyń jobasy aýdannyń infraqurylymyn jaqsartyp qana qoimai, jyldyń kez kelgen ýaqytynda otbasylyq demalys pen sporttyq is-shara ótkizýdiń jańa ortalyǵyna ainalady.
Sonymen qatar Almaty ákimine Abai dańǵylynan Jandosov kóshesine deiin Gagarin gúlzaryn qaita qurý jáne abattandyrý boiynsha 2024 jylǵa josparlanǵan joba tanystyryldy.
Bostandyq aýdanyn abattandyrý aiasynda biyl 80 aýla aýmaǵynda kúrdeli jóndeý jumysy aiaqtaldy. «Halyq qatysatyn biýdjet» jobasy aiasynda 4 qoǵamdyq keńistikke, 10 sport jáne balalar alańyna jóndeý jumysyn júrgizýdi kózdeitin 800 mln teńgege 17 joba iriktelgen bolatyn.
12 jerasty jáne 7 jerústi jaiaý júrginshiler ótkeline aǵymdaǵy jóndeý jumystary júrgizilip jatyr. 2024 jylǵa «Atakent», «Iýjnyi» parkterin, Úlken Almaty jáne Esentai ózenderiniń jaǵalaýlaryn, birqatar sýburqaq qamtityn Tuńǵysh Prezident saiabaǵyn kúrdeli jóndeý josparlanǵan.
