بوس جەر ينفراقۇرىلىم نىسانىنا اينالىپ، الماتىنىڭ وڭتۇستىك بولىگىندەگى قوعامدىق كەڭىستىكتەرگە ماڭىزدى ورىن بولادى. قۇرىلىس جۇمىستارى بيىل 10 قاراشادا باستالدى.
اۋماقتى اباتتاندىرۋدا قوعامدىق تىڭداۋ مەن جوبانى تالقىلاۋ بارىسىندا ايتىلعان دۇنيەلەر ەسكەرىلگەن. مۇندا ويىن الاڭى، فۋتبول جانە باسكەتبول الاڭى، سكەيتپارك، سونىمەن قاتار يتپەن سەرۋەندەۋگە ارنالعان ورىن بولادى. سونىمەن قاتار ورىندىق، قوقىس جاشىكتەرى مەن پەرگولالار قويىلماقشى. اعاشتار وتىرعىزىپ، سۋارۋ جۇيەسىمەن قامتىلادى. اۋماقتى اباتتاندىرۋ جۇمىستارى الەۋمەتتىك جاۋاپكەرشىلىك اياسىندا جۇرگىزىلەدى.
بوستاندىق اۋدانىنىڭ اكىمى سانجار الين قالا باسشىسىنا اعاشتاردىڭ سانيتارلىق ماقساتتا بۇتاقتارى كەسىلگەنىن، اعاش وتىرعىزىپ، فۋتبول الاڭى جوندەلگەنى تۋرالى ەسەپ بەردى. قازىرگى ۋاقىتتا جۇمىستىڭ 15% اياقتالعان. جوبانى 2024 جىلدىڭ تامىزىنا دەيىن اياقتاۋ جوسپارلانىپ وتىر.
ەربولات دوسايەۆ ايماقتاردى ءبولۋدى ەسكەرىپ، بوس ۋاقىت پەن دەمالىس الاڭدارىن قايتا قۇرۋدى، قارتتار مەن بالالار ءۇشىن ولاردى اباتتاندىرۋ، شاتىرلار جاساۋدى تاپسىرىلدى.
جاڭا قوعامدىق اۋماقتىڭ جوباسى اۋداننىڭ ينفراقۇرىلىمىن جاقسارتىپ قانا قويماي، جىلدىڭ كەز كەلگەن ۋاقىتىندا وتباسىلىق دەمالىس پەن سپورتتىق ءىس-شارا وتكىزۋدىڭ جاڭا ورتالىعىنا اينالادى.
سونىمەن قاتار الماتى اكىمىنە اباي داڭعىلىنان جاندوسوۆ كوشەسىنە دەيىن گاگارين گۇلزارىن قايتا قۇرۋ جانە اباتتاندىرۋ بويىنشا 2024 جىلعا جوسپارلانعان جوبا تانىستىرىلدى.
بوستاندىق اۋدانىن اباتتاندىرۋ اياسىندا بيىل 80 اۋلا اۋماعىندا كۇردەلى جوندەۋ جۇمىسى اياقتالدى. «حالىق قاتىساتىن بيۋدجەت» جوباسى اياسىندا 4 قوعامدىق كەڭىستىككە، 10 سپورت جانە بالالار الاڭىنا جوندەۋ جۇمىسىن جۇرگىزۋدى كوزدەيتىن 800 ملن تەڭگەگە 17 جوبا ىرىكتەلگەن بولاتىن.
12 جەراستى جانە 7 جەرۇستى جاياۋ جۇرگىنشىلەر وتكەلىنە اعىمداعى جوندەۋ جۇمىستارى جۇرگىزىلىپ جاتىر. 2024 جىلعا «اتاكەنت»، «يۋجنىي» پاركتەرىن، ۇلكەن الماتى جانە ەسەنتاي وزەندەرىنىڭ جاعالاۋلارىن، ءبىرقاتار سۋبۇرقاق قامتيتىن تۇڭعىش پرەزيدەنت ساياباعىن كۇردەلى جوندەۋ جوسپارلانعان.
