Almatyda BAQ qyzmetkerleri kúnine orai erekshe formattaǵy is-shara ótti. "Órt sóndirýshi bolýǵa tyrys" atty kvestke túrli media uiymdarynan onǵa jýyq maman qatysty. Olar bir kúnge kásibi qutqarýshylardyń róline enip, tótenshe jaǵdai kezinde áreket etýdiń qyr-syrymen tanysty.
Mikrofonyn arnaiy quraldarǵa aiyrbastaǵan jýrnalister №10 mamandandyrylǵan órt sóndirý bóliminde bas qosty. Aldymen qutqarýshylar olardy arnaiy tehnikalarmen tanystyryp, ár kóliktiń qyzmeti men múmkindikterin egjei-tegjeili túsindirdi. Odan keiin tájiribelik jattyǵý uiymdastyrylyp, qatysýshylar joǵary qysymmen sý atqylaityn oqpan arqyly dopty dál tigizýge tyrysty.
Aita keteiik, mundai jabdyq sekýndyna 40 litr sý shashady eken. Osy qarqynmen jumys istegende, 5 tonnalyq kóliktiń sýy 2 minýtta, al 8 tonnalyq tehnikanyń qory úsh jarym minýtta taýsylatyn kórinedi. Bul rette qutqarýshylar oqiǵa ornyna sýsyz keledi degen qate pikirdiń shyndyqqa janaspaitynyn aitady.
– Órtke biz eki bólimshe bolyp kelemiz. Birinshi bólimsheniń sýy 4-5 minýtta bitip qalady. Sondyqtan úzilissiz sýmen qamtamasyz etý úshin ekinshi bólimshe avtokólikti sý kózine qoiady. Óitkeni oqpan sekýndyna 7 litr sý shashady. Qanat jaiý barysynda 500 litr sýdy qurtyp alamyz, – dedi TJD № 9 órt sóndirý bóliminiń bólimshe komandiri Aidos Dýlatov.
Alyp shahar Almatyda tótenshe jaǵdai nemese órt bolǵanda órt sóndirýshiler 2 minýttyń ishinde jinalyp, oqiǵa ornyna barý kerek. Olar aldymen arnaiy kiimdi 19 sekýndta kiip, oqiǵa ornyna jóneledi. Al ǵimarattaǵy órtterdi sóndirý úshin eń aldymen órt sóndirgishti qolǵa alyp, 1-2 metr qashyqtyqta órtti sóndirý kerek.
Qatysýshylar tilsiz jaýmen kúresip qana qoimai, tótenshe jaǵdai kezindegi is-qimyldaryn da pysyqtady. Qaýipsizdik talaptaryna sai arnaiy kiim kigen BAQ ókilderi qoiý tútinge toly bólmege kirdi. Olar baǵytynan adaspai, túrli kedergilerdi eńserip shyqty. Al jattyǵýdyń sońǵy bóliginde teńselmeli kópirden ótip, jalyn arasyndaǵy jolmen ilgeri jyljydy.
– Bul kiimmen júrgen jeńil dep aitýǵa bolmaidy. Óitkeni ǵimarat ishine kirgen kezde qarańǵy, tar. Eńkeiip, basty tómen túsirip júrý kerek jáne kiim qysyp turady. Jai júgire almaisyń. Osyndai aýyr jumys atqaryi júrgen azamattarǵa myń rahmet aitamyn. Osylai qanshama adamdy qutqaryp júr, – deidi qatysýshy Diasken Baitybaev.
Is-shara sońynda Almaty qalasy Tótenshe jaǵdailar departamentiniń bastyǵy Nurlan Atyǵaev aqparat aidynynda aianbai eńbek etip júrgen jýrnalisterdi kásibi merekelerimen quttyqtady. Qaýip-qaterdiń bel ortasynda júrgen qutqarýshylardyń eńbegin der kezinde, shynaiy jetkizip júrgen qalam ielerine alǵys aityp, birqatar BAQ ókilderine qurmet gramotalaryn tabys etti.
