الماتىدا ب ا ق قىزمەتكەرلەرى كۇنىنە وراي ەرەكشە فورماتتاعى ءىس-شارا ءوتتى. "ءورت ءسوندىرۋشى بولۋعا تىرىس" اتتى كۆەستكە ءتۇرلى مەديا ۇيىمدارىنان ونعا جۋىق مامان قاتىستى. ولار ءبىر كۇنگە كاسىبي قۇتقارۋشىلاردىڭ رولىنە ەنىپ، توتەنشە جاعداي كەزىندە ارەكەت ەتۋدىڭ قىر-سىرىمەن تانىستى.
ميكروفونىن ارنايى قۇرالدارعا ايىرباستاعان جۋرناليستەر №10 مامانداندىرىلعان ءورت ءسوندىرۋ بولىمىندە باس قوستى. الدىمەن قۇتقارۋشىلار ولاردى ارنايى تەحنيكالارمەن تانىستىرىپ، ءار كولىكتىڭ قىزمەتى مەن مۇمكىندىكتەرىن ەگجەي-تەگجەيلى ءتۇسىندىردى. ودان كەيىن تاجىريبەلىك جاتتىعۋ ۇيىمداستىرىلىپ، قاتىسۋشىلار جوعارى قىسىممەن سۋ اتقىلايتىن وقپان ارقىلى دوپتى ءدال تيگىزۋگە تىرىستى.
ايتا كەتەيىك، مۇنداي جابدىق سەكۋندىنا 40 ليتر سۋ شاشادى ەكەن. وسى قارقىنمەن جۇمىس ىستەگەندە، 5 توننالىق كولىكتىڭ سۋى 2 مينۋتتا، ال 8 توننالىق تەحنيكانىڭ قورى ءۇش جارىم مينۋتتا تاۋسىلاتىن كورىنەدى. بۇل رەتتە قۇتقارۋشىلار وقيعا ورنىنا سۋسىز كەلەدى دەگەن قاتە پىكىردىڭ شىندىققا جاناسپايتىنىن ايتادى.
– ورتكە ءبىز ەكى بولىمشە بولىپ كەلەمىز. ءبىرىنشى بولىمشەنىڭ سۋى 4-5 مينۋتتا ءبىتىپ قالادى. سوندىقتان ءۇزىلىسسىز سۋمەن قامتاماسىز ەتۋ ءۇشىن ەكىنشى بولىمشە اۆتوكولىكتى سۋ كوزىنە قويادى. ويتكەنى وقپان سەكۋندىنا 7 ليتر سۋ شاشادى. قانات جايۋ بارىسىندا 500 ليتر سۋدى قۇرتىپ الامىز، – دەدى تجد № 9 ءورت ءسوندىرۋ ءبولىمىنىڭ بولىمشە كومانديرى ايدوس دۋلاتوۆ.
الىپ شاھار الماتىدا توتەنشە جاعداي نەمەسە ءورت بولعاندا ءورت سوندىرۋشىلەر 2 مينۋتتىڭ ىشىندە جينالىپ، وقيعا ورنىنا بارۋ كەرەك. ولار الدىمەن ارنايى كيىمدى 19 سەكۋندتا كيىپ، وقيعا ورنىنا جونەلەدى. ال عيماراتتاعى ورتتەردى ءسوندىرۋ ءۇشىن ەڭ الدىمەن ءورت سوندىرگىشتى قولعا الىپ، 1-2 مەتر قاشىقتىقتا ءورتتى ءسوندىرۋ كەرەك.
قاتىسۋشىلار ءتىلسىز جاۋمەن كۇرەسىپ قانا قويماي، توتەنشە جاعداي كەزىندەگى ءىس-قيمىلدارىن دا پىسىقتادى. قاۋىپسىزدىك تالاپتارىنا ساي ارنايى كيىم كيگەن ب ا ق وكىلدەرى قويۋ تۇتىنگە تولى بولمەگە كىردى. ولار باعىتىنان اداسپاي، ءتۇرلى كەدەرگىلەردى ەڭسەرىپ شىقتى. ال جاتتىعۋدىڭ سوڭعى بولىگىندە تەڭسەلمەلى كوپىردەن ءوتىپ، جالىن اراسىنداعى جولمەن ىلگەرى جىلجىدى.
– بۇل كيىممەن جۇرگەن جەڭىل دەپ ايتۋعا بولمايدى. ويتكەنى عيمارات ىشىنە كىرگەن كەزدە قاراڭعى، تار. ەڭكەيىپ، باستى تومەن ءتۇسىرىپ ءجۇرۋ كەرەك جانە كيىم قىسىپ تۇرادى. جاي جۇگىرە المايسىڭ. وسىنداي اۋىر جۇمىس اتقارىي جۇرگەن ازاماتتارعا مىڭ راحمەت ايتامىن. وسىلاي قانشاما ادامدى قۇتقارىپ ءجۇر، – دەيدى قاتىسۋشى دياسكەن بايتىبايەۆ.
ءىس-شارا سوڭىندا الماتى قالاسى توتەنشە جاعدايلار دەپارتامەنتىنىڭ باستىعى نۇرلان اتىعايەۆ اقپارات ايدىنىندا ايانباي ەڭبەك ەتىپ جۇرگەن جۋرناليستەردى كاسىبي مەرەكەلەرىمەن قۇتتىقتادى. قاۋىپ-قاتەردىڭ بەل ورتاسىندا جۇرگەن قۇتقارۋشىلاردىڭ ەڭبەگىن دەر كەزىندە، شىنايى جەتكىزىپ جۇرگەن قالام يەلەرىنە العىس ايتىپ، ءبىرقاتار ب ا ق وكىلدەرىنە قۇرمەت گراموتالارىن تابىس ەتتى.
