Almatyda 83 jastaǵy Amantai qajyǵa qatysty qylmystyq is toqtatyldy, dep habarlaidy Dalanews.kz.
Tengrinews.kz málimetinshe, Almaly aýdandyq sotynda qaladaǵy sport keshenderiniń birinde áieldi baspaldaqtan iterip jibergeni úshin aiyptalǵan 83 jastaǵy Amantai qajynyń isi qaraldy.
Eske salsaq, shilde aiynda áleýmettik jelilerde Amantai qajy áiel adamdy baspaldaqtan iterip jibergen sáttiń videosy taraǵan bolatyn.
Áleýmettik jelidegi aqparatqa sáikes, qulaǵan áiel jambas súiegin syndyryp alǵan.
Qasaqana ma, abaisyzda ma?
Bastapqyda tergeý isi Qylmystyq kodekstiń 107-baby («Densaýlyqqa qasaqana ortasha aýyr ziian keltirý») boiynsha júrgizilgen. Alaida 23 qyrkúiektegi sot otyrysynda aiyptaýshy isti 114-baptyń 3-bóligine («Densaýlyqqa abaisyzda aýyr ziian keltirý») qaita saralaǵany belgili boldy.
Bul bap boiynsha:
•1000 AEK-ke deiin aiyppul,
•400 saǵatqa deiin qoǵamdyq jumys,
•bostandyǵyn shekteý nemese 1 jylǵa deiin bas bostandyǵynan aiyrý jazasy qarastyrylǵan.
Sot otyrysy onlain ótti. Isti sýdia Ernar Qasymbekov qarady.
Aita keterligi, jábirlenýshi protseske qatyspady. Sýdianyń aitýynsha, áiel isti mediatsiialyq kelisim negizinde toqtatý týraly ótinish bergen.
"Jábirlenýshi Amantai Asylbekke eshqandai shaǵymy joq ekenin aitty. Ótinishinde ol moraldyq jáne materialdyq shyǵynnyń ótelgenin kórsetken. Densaýlyǵyna bailanysty sotqa qatysa almaitynyn da jazypty", – dedi sýdia.
Ótemaqynyń naqty mólsheri jariia etilmedi.
Jábirlenýshiniń ótinishin prokýror Qazybek Asylhan, aiyptalýshy Amantai qajy jáne onyń qorǵaýshysy Jańǵazy Kúnserkin qoldady.
"Men adal ári taza adammyn. Men kináli emespin. Eshqandai qylmys jasaǵan joqpyn, ony itergen de joqpyn", – dedi Amantai qajy.
Keńesý bólmesine ketken sýdia Ernar Qasymbekov taraptardyń tatýlasýyna jáne shyǵynnyń ótelýine bailanysty isti toqtatý týraly sheshim shyǵardy.
Buǵan deiin Amantai qajy óz nusqasyn aityp, bolǵan jaǵdaidy «jalǵan aiyp» dep ataǵan edi. Onyń sózinshe, bul – jemqorlar men mafiianyń oǵan qarsy uiymdastyrǵan qastandyǵy.
