Almatyda otbasylyq janjal adam ólimimen aiaqtaldy. Qalalyq sot sheshimimen kámeletke tolmaǵan qyzdyń qazasyna sebepker bolǵan áke 4 jyl 6 aiǵa bas bostandyǵynan aiyryldy, dep habarlaidy Dalanews.kz.
Tergeý derekterine sáikes, marqum qyz qytai tilin jetik meńgerip, Qazaqstanǵa kelgen qytailyq kásipkerlerge aýdarmashy bolyp jumys istegen.
Áńgimelerdiń birinde ol densaýlyǵynda kúrdeli másele baryn, naqty aitqanda búirek dertimen aýyratynyn jetkizgen. Sonymen qatar óz jasyn shetel azamattaryna 20 jastamyn dep tanystyrǵany anyqtalǵan.
Qytai kásipkerleriniń biri qyzǵa Qytaiǵa baryp emdelýdi usynǵan. Osy usynystan keiin ol alys saparǵa daiyndala bastaǵan.
Bul jaitty bilgen ata-anasy qatty alańdap, qyzdaryn shetel azamattary aldap áketýi múmkin dep kúdiktengen.
Qaiǵyly oqiǵa 2025 jylǵy 5 sáýirde bolǵan. Sol kúni ákeci, anasy jáne úlken qyzdary qytai azamattary ýaqytsha turyp jatqan páterge barǵan. Olar óz kúdigi boiynsha alaiaqtyqty uiymdastyrdy dep eseptegen Qytai Halyq Respýblikasynyń azamaty F.J.-ǵa shabýyl jasaǵan.
Er adam soqqy saldarynan ortasha aýyr dene jaraqatyn alǵan.
Janjal kezinde áke qolyna pyshaq alyp, Qytai azamatyna qarai sermegen. Alaida dál sol sátte aldynan týǵan qyzy shyǵyp, sol jaq keýde tusynan pyshaq jaraqatyn alǵan.
Osydan keiin ata-anasy jedel járdem shaqyrǵan.
Al F.J. esimdi Qytai azamaty moinynan eki ret kesilgen jaraqat alyp, qasyndaǵy úsh serigimen birge páterden qashyp ketken.
Aýyr hálde aýrýhanaǵa jetkizilgen qyzǵa jarty saǵat boiy reanimatsiialyq kómek kórsetilgen.
Alaida dárigerler barlyq kúsh-jigerine qaramastan, onyń ómirin aman alyp qala almady. Qyzdyń qaza tapqany resmi túrde tirkeldi.
Ákege qatysty bastapqyda birneshe bap boiynsha qylmystyq is qozǵalǵan:
adam óltirýge oqtalý;
abaisyzda ólimge ákep soqqan aýyr dene jaraqatyn keltirý;
ortasha aýyrlyqtaǵy ziian keltirý.
Alaida tergeý barysynda soqqyǵa jyǵylǵan Qytai azamaty aiyptalýshyǵa eshqandai talap-aryzy joq ekenin, onymen tatýlasqanyn jáne keshirgenin málimdegen.
Osyǵan bailanysty adam óltirýge oqtalý baby isten alynyp tastaldy.
Almaty qalasynyń mamandandyrylǵan aýdanaralyq qylmystyq soty er adamdy QR Qylmystyq kodeksiniń 104 jáne 106-baptary boiynsha kináli dep tanyp, oǵan 4 jyl 6 ai merzimge bas bostandyǵynan aiyrý jazasyn taǵaiyndady.
Úkim ázirge zańdy kúshine engen joq.
