2025 jyldyń 24 shildesi, beisenbi kúni saǵat 10:00-de Almaty qalasynda «Jer-2025» respýblikalyq oqý-jattyǵýy aiasynda dabyl qaǵý júiesi tekseriledi,- dep habarlaidy Dalanews.kz
Mamandardyń aitýynsha, bul josparly shara, sondyqtan dabyl dybysy estilgende qorqýdyń nemese dúrbeleńge salynýdyń qajeti joq. Oqý-jattyǵýdyń maqsaty — azamattyq qorǵaý júiesiniń daiyndyǵyn pysyqtap, halyqtyń dabyl dybysyna qalai áreket etetinin tekserý.
«Almaty seismikalyq qaýipti aimaqta ornalasqandyqtan, mundai jattyǵýlardy júieli ótkizý asa mańyzdy. Árbir turǵyn evakýatsiia joldaryn aldyn ala bilip, qaýipsiz oryndardy belgileýi tiis», — delingen habarlamada.
Qaýipsiz oryndarǵa ashyq alańdar, saiabaqtar, stadiondar siiaqty ǵimarattardan, elektr jelilerinen jáne úlken aǵashtardan alys jerler jatady.
Eske sala keteiik, mundai oqý-jattyǵýlar — qala turǵyndaryn tótenshe jaǵdai kezinde durys áreket etýge úiretýdiń bir joly. «Jer-2025» aiasyndaǵy sharalar Qazaqstannyń basqa óńirlerinde de kezeń-kezeńimen ótedi.
