2025 جىلدىڭ 24 شىلدەسى، بەيسەنبى كۇنى ساعات 10:00-دە الماتى قالاسىندا «جەر-2025» رەسپۋبليكالىق وقۋ-جاتتىعۋى اياسىندا دابىل قاعۋ جۇيەسى تەكسەرىلەدى،- دەپ حابارلايدى Dalanews.kz
مامانداردىڭ ايتۋىنشا، بۇل جوسپارلى شارا، سوندىقتان دابىل دىبىسى ەستىلگەندە قورقۋدىڭ نەمەسە دۇربەلەڭگە سالىنۋدىڭ قاجەتى جوق. وقۋ-جاتتىعۋدىڭ ماقساتى — ازاماتتىق قورعاۋ جۇيەسىنىڭ دايىندىعىن پىسىقتاپ، حالىقتىڭ دابىل دىبىسىنا قالاي ارەكەت ەتەتىنىن تەكسەرۋ.
«الماتى سەيسميكالىق ءقاۋىپتى ايماقتا ورنالاسقاندىقتان، مۇنداي جاتتىعۋلاردى جۇيەلى وتكىزۋ اسا ماڭىزدى. ءاربىر تۇرعىن ەۆاكۋاسيا جولدارىن الدىن الا ءبىلىپ، ءقاۋىپسىز ورىنداردى بەلگىلەۋى ءتيىس»، — دەلىنگەن حابارلامادا.
ءقاۋىپسىز ورىندارعا اشىق الاڭدار، ساياباقتار، ستاديوندار سياقتى عيماراتتاردان، ەلەكتر جەلىلەرىنەن جانە ۇلكەن اعاشتاردان الىس جەرلەر جاتادى.
ەسكە سالا كەتەيىك، مۇنداي وقۋ-جاتتىعۋلار — قالا تۇرعىندارىن توتەنشە جاعداي كەزىندە دۇرىس ارەكەت ەتۋگە ۇيرەتۋدىڭ ءبىر جولى. «جەر-2025» اياسىنداعى شارالار قازاقستاننىڭ باسقا وڭىرلەرىندە دە كەزەڭ-كەزەڭىمەن وتەدى.
