Almatynyń Kamensk ústirti shaǵyn aýdanynda sý tapshylyǵy máselesi sheshilip, turǵyndar úzdiksiz sýmen qamtamasyz etildi. Bul Almaty ákimi Erbolat Dosaevtyń tapsyrmasymen salynǵan «Balqash» taza sý rezervýaryn paidalanýǵa bergennen keiin júzege asty, – dep habarlaidy Dalanews.kz Almaty qalasy ákiminiń baspasóz qyzmetine silteme jasap.
Kamensk ústirti shaǵyn aýdanynda 8 myń adam turady. Sonyń biri Malkovtar otbasy munda birneshe jyldan beri turady. Tatiana Malkovanyń aitýynsha, sý tapshylyǵy máselesi ásirese, jazda qatty seziledi.
– Bizdiń alapta sý qysymy álsiredi. Adam kóbeidi, barlyǵy baqshasyn sýarady, sý jetpeidi. Biz taý sýyn paidalandyq, keide bizdiń shaǵyn aýdanǵa kelgen sý tasityn kólikten alyp keldik. Eki jyl buryn ákimdikte bizge jańa sý jinaqtaǵysh qurylysynyń arqasynda úzdiksiz sýmen jabdyqtalady dep ýáde bergen bolatyn. Nysan ýáde etilgendei tez salyndy. Bizge sý júrgizdi, qysym óte kúshti, buǵan óte qýanyshtymyz. Qala ákimi Erbolat Dosaevqa atqarǵan jumystary úshin alǵys aitamyz, – dedi ol.
Kamensk ústirtiniń turǵyny Vitalii Zamaraev sýmen jabdyqtaý berilgen sátten bastap máseleniń sheshilgenin atady.
– Buryn bizde sýyq sýmen qamtamasyz etý problemasy boldy. Qazir eshqandai másele joq, túnde óshpeidi, kúndiz sý únemi bolady. Barlyq turǵyn qýanyshty, riza. Bizde jeke úi bolǵandyqtan, bizge sý kóp qajet, baqshany sýaramyz, basqa da sharýashylyq jumystarǵa sý kerek. Qabyldanǵan sharalar úshin alǵys aitamyz, biz qazir jaily jaǵdaida ómir súrip jatyrmyz, – dedi turǵyn Vitalii Zamaraev.
Turǵynnyń biri Laýra Qurmanǵalieva oiyn aitty.
– Buǵan deiingi kezdesýde Almaty qalasy ákimi bizge, Ladýshkin kóshesinde turatyn turǵyndarǵa ortalyq sýmen jabdyqtaýdy júrgizýge ýáde berdi. Ladýshkin kóshesiniń barlyq turǵynynyń atynan oryndalǵan ýádege rizashylyǵymyzdy bildiremiz, qazir bizge sý keldi. Sýdyń qysymy jaqsy, eshqandai másele joq, – dedi ol.
Esterińizge sala keteiik, Medeý aýdanynyń joǵarǵy jaǵyn sýmen jabdyqtaý jer ústi kózderiniń áser etý aimaǵynda ornalasqan. Buǵan deiin bul aýmaq Almaty oblysy Talǵar aýdanynyń quramyna kirgen. 2013-2014 jyldary olar Almaty qalasynyń Medeý aýdanyna qosyldy. Sodan beri osy shaǵyn aýdannyń turǵyndaryn sapaly sýmen jáne kárizben qamtamasyz etý máselesi ózekti bolyp kelgen.
2022 jyly uńǵymalardaǵy sý deńgeiiniń 2,5 ese – 150-den 60 m3-ge deiin tómendeýine bailanysty jaǵdai ýshyǵyp ketti. Sodan keiin qala ákimi turǵyndardy jer asty sýmen jabdyqtaý kózderine qosý boiynsha alǵashqy aýqymdy jobany júzege asyrý týraly sheshim qabyldady.
Qurylys jumystary 2023 jyldyń mamyrynda bastaldy. 6,9 myń tekshe metrge 5 rezervýar, táýligine 7,3 myń tekshe metrge 3 uńǵyma salyndy, 6,1 km jańa magistraldyq jeli salyndy. Sondai-aq, qoldanystaǵy 8 uńǵyma qaita jańartylyp, jabdyqtary aýystyryldy.
Qosymsha qurylys jumystary aiaqtalǵannan keiin Kólsai, Muztaý jáne Iýbileinyi shaǵyn aýdandaryna kezeń-kezeńimen sý beriledi. Sonyń nátijesinde tórt shaǵyn aýdannyń 20 myń turǵyny turaqty sýmen qamtamasyz etiledi.
