Almaty qalasy ákimdiginiń Ekonomika basqarmasy 2024 jyldyń qańtar-qyrkúiek ailarynda shahardyń qysqa merzimdi ekonomikalyq kórsetkishi 104,1%-ǵa deiin óskenin alǵa tartty, – dep habarlaidy Dalanews.kz Almaty qalasy ákiminiń baspasóz qyzmetine silteme jasap.
– Almatynyń jalpy óńirlik ónimi jyldyń birinshi jartysynda 3,5%-ǵa ósti (Qazaqstan boiynsha – 3,2%). Ekonomikanyń ósý draiverleri – kólik (+21,6%) jáne qurylys (+11%) salalarynda oryn alǵan. 2024 jyldyń 9 aiynyń qorytyndysy boiynsha azyq-túlik ónerkásibindegi ósim qarqyny qalpyna kelgen. Tamaq ónimderi óndirisiniń indeksi 2024 jyldyń qańtar aiyndaǵy 84,6%-dan 89,3%-ǵa, al sýsyndar óndirisi 56,9%-dan 91,3%-ǵa deiin ósti, – dedi Ekonomika basqarmasynyń ókilderi.
Sondai-aq, qyrkúiek aiynda iskerlik belsendilik indeksi 53,4%-ǵa deiin artty. Jalpy, 2024 jyldyń qorytyndysy boiynsha Almaty ekonomikasynyń ósýi 5,5% deńgeiinde, al 2025 jyly 6,4% deńgeiinde bolady dep boljanyp otyr.
Al aǵymdaǵy jyldyń birinshi jartyjyldyǵynda Almatyda ShOB ónimin shyǵarý 28,4%-ǵa 5,5 trln teńgege deiin ulǵaiǵan. Qańtar-qyrkúiekte jumys istep turǵan ShOB sýbektileriniń sany 6,2%-ǵa 361,1 myń birlikke deiin ósti. Ekonomika basqarmasynyń boljamy boiynsha, Almatynyń 2025 jylǵa arnalǵan biýdjeti 20%-ǵa 2,1 trln teńgege deiin ulǵaiady.
– ShOB-ty qoldaý úshin 2024 jyly memlekettik biýdjetten sýbsidiialaýǵa, kepildik berýge jáne kreditteýge 53,1 mlrd teńge bólindi. 2024 jyldyń 9 aiynda 113,1 mlrd teńge nesie somasyna 1,7 myń jańa ShOB jobasyna qoldaý kórsetildi, ótken jyldary maquldanǵan 2 myńnan astam jobanyń syiaqy mólsherlemesiniń bir bóligin sýbsidiialaý túrinde qoldaý alýdy jalǵastyrýda, – dep habarlady ekonomika basqarmasy.
Bul Almatynyń JÓÓ-degi ShOB úlesin 2024 jyly 60%-ǵa deiin, 2025 jyly 62%-ǵa deiin ulǵaitýǵa yqpal etedi. 2024 jyldyń birinshi toqsanynda ShOB úlesi 55,2%-dy qurady.
Almaty ekonomika basqarmasynyń habarlaýynsha, indýstrialdy jáne arnaiy ekonomikalyq aimaqtar alańdarynda jalpy somasy 452 mlrd teńgege 87 investitsiialyq joba iske asyrylýda. 2024 jyly 4,5 myń jańa jumys ornyn qurýmen 220 mlrd teńge somasyna 40 joba iske asatyn bolady.
