الماتى قالاسى اكىمدىگىنىڭ ەكونوميكا باسقارماسى 2024 جىلدىڭ قاڭتار-قىركۇيەك ايلارىندا شاھاردىڭ قىسقا مەرزىمدى ەكونوميكالىق كورسەتكىشى 104،1%-عا دەيىن وسكەنىن العا تارتتى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.
– الماتىنىڭ جالپى وڭىرلىك ءونىمى جىلدىڭ ءبىرىنشى جارتىسىندا 3،5%-عا ءوستى (قازاقستان بويىنشا – 3،2%). ەكونوميكانىڭ ءوسۋ درايۆەرلەرى – كولىك (+21،6%) جانە قۇرىلىس (+11%) سالالارىندا ورىن العان. 2024 جىلدىڭ 9 ايىنىڭ قورىتىندىسى بويىنشا ازىق-تۇلىك ونەركاسىبىندەگى ءوسىم قارقىنى قالپىنا كەلگەن. تاماق ونىمدەرى ءوندىرىسىنىڭ يندەكسى 2024 جىلدىڭ قاڭتار ايىنداعى 84،6%-دان 89،3%-عا، ال سۋسىندار ءوندىرىسى 56،9%-دان 91،3%-عا دەيىن ءوستى، – دەدى ەكونوميكا باسقارماسىنىڭ وكىلدەرى.
سونداي-اق، قىركۇيەك ايىندا ىسكەرلىك بەلسەندىلىك يندەكسى 53،4%-عا دەيىن ارتتى. جالپى، 2024 جىلدىڭ قورىتىندىسى بويىنشا الماتى ەكونوميكاسىنىڭ ءوسۋى 5،5% دەڭگەيىندە، ال 2025 جىلى 6،4% دەڭگەيىندە بولادى دەپ بولجانىپ وتىر.
ال اعىمداعى جىلدىڭ ءبىرىنشى جارتىجىلدىعىندا الماتىدا شوب ءونىمىن شىعارۋ 28،4%-عا 5،5 ترلن تەڭگەگە دەيىن ۇلعايعان. قاڭتار-قىركۇيەكتە جۇمىس ىستەپ تۇرعان شوب سۋبەكتىلەرىنىڭ سانى 6،2%-عا 361،1 مىڭ بىرلىككە دەيىن ءوستى. ەكونوميكا باسقارماسىنىڭ بولجامى بويىنشا، الماتىنىڭ 2025 جىلعا ارنالعان بيۋدجەتى 20%-عا 2،1 ترلن تەڭگەگە دەيىن ۇلعايادى.
– شوب-تى قولداۋ ءۇشىن 2024 جىلى مەملەكەتتىك بيۋدجەتتەن سۋبسيديالاۋعا، كەپىلدىك بەرۋگە جانە كرەديتتەۋگە 53،1 ملرد تەڭگە ءبولىندى. 2024 جىلدىڭ 9 ايىندا 113،1 ملرد تەڭگە نەسيە سوماسىنا 1،7 مىڭ جاڭا شوب جوباسىنا قولداۋ كورسەتىلدى، وتكەن جىلدارى ماقۇلدانعان 2 مىڭنان استام جوبانىڭ سىياقى مولشەرلەمەسىنىڭ ءبىر بولىگىن سۋبسيديالاۋ تۇرىندە قولداۋ الۋدى جالعاستىرۋدا، – دەپ حابارلادى ەكونوميكا باسقارماسى.
بۇل الماتىنىڭ جوو-دەگى شوب ۇلەسىن 2024 جىلى 60%-عا دەيىن، 2025 جىلى 62%-عا دەيىن ۇلعايتۋعا ىقپال ەتەدى. 2024 جىلدىڭ ءبىرىنشى توقسانىندا شوب ۇلەسى 55،2%-دى قۇرادى.
الماتى ەكونوميكا باسقارماسىنىڭ حابارلاۋىنشا، يندۋستريالدى جانە ارنايى ەكونوميكالىق ايماقتار الاڭدارىندا جالپى سوماسى 452 ملرد تەڭگەگە 87 ينۆەستيسيالىق جوبا ىسكە اسىرىلۋدا. 2024 جىلى 4،5 مىڭ جاڭا جۇمىس ورنىن قۇرۋمەن 220 ملرد تەڭگە سوماسىنا 40 جوبا ىسكە اساتىن بولادى.
