Qala ákiminiń orynbasary Erjan Babaqumarov shahar basshysy Baqytjan Saǵyntaevtyń atynan ardagerlerge Táýelsizdiktiń 30 jyldyq kezeńinde qalanyń damýyna qosqan zor úlesi úshin alǵys aityp, densaýlyq pen baq-bereke tiledi.
Jiyn barysynda aǵymdaǵy jyly atqarylǵan jumystar qorytyndylandy. 2016 jylǵy 1 sáýirde ótken IX konferentsiiadan bergi bes jyl ýaqyt ishinde Almatynyń ardagerler uiymy 25 myń adamǵa kóbeidi. Búginde qalada 232 myńǵa jýyq zeinetker turady. Biyl qala boiynsha áleýmettik qoldaýǵa 25 mlrd teńge bólinip, 124 myń adam qamtylǵan. Sonymen qatar, eńbek ujymdary men demeýshiler 52 myń soǵys jáne eńbek ardagerlerine 200 mln teńge somasyna túrli áleýmettik qoldaý kórsetti.
– Qalada 9 belsendi uzaq ómir súrý ortalyǵy jumys isteidi, olarǵa 25 myń qart adam barady. Belsendi uzaq ómir súrý ortalyqtarynda, skverlerde, saiabaqtarda, sport alańdarynda túrli sporttyq-saýyqtyrý is-sharalary ótkiziledi. Jyl saiyn sporttyq is-sharalarǵa 3 myńnan astam zeinetker qatysady, olar shahmat, doiby, toǵyz qumalaq, tennis, billiard, boýling, atys boiynsha jarystar. Barlyq jerde skandinaviialyq júris, ioga, aikýn jáne basqa da saýyqtyrý sharalary boiynsha sabaqtar ótkiziledi. Almatydaǵy ardagerler uiymdary únemi oqiǵa ortasynda bolyp, ári qarai qalanyń qoǵamdyq ómirine belsendi, tikelei qatysatyn bolady. Óskeleń urpaqqa árdaiym úlgi kórsetetin qariialarymyz bar, – dedi óz sózinde Almaty qalalyq ardagerler keńesiniń tóraǵasy Aqan Bijanov.
Konferentsiiaǵa qatysýshylar ardagerler uiymynyń biylǵy atqarylǵan qyzmetterin pysyqtap, aldaǵy kezeńge arnalǵan mindetterdi belgiledi.
Lidiia Kochetova, Sotsialistik Eńbek Eri:
– Qazirgi ýaqytta pandemiiaǵa qaramastan, Memleket Basshysy Qasym-Jomart Toqaev kezekti Joldaýynda bizdiń aldymyzǵa naqty mindetter qoidy. Kópti kórgen, tájiribeli ardagerler jastarǵa rýhani, adamgershilik tárbie berýde urpaqtar estafetasynyń jolserikteri. Biz árqashan QR Prezidentiniń saiasatyn qoldaimyz. Ákimdik, qoǵamdyq uiymdar, máslihat depýtattary qala ardagerlerine qamqorlyq jasaýdy jalǵastyrýda. Áýezov aýdanynda 46 myńnan astam zeinetker turady, onyń ishinde 19 UOS múgedekteri men qatysýshylary, 2000 eńbek maidanynyń qatysýshylary, 9 fashistik lagerlerdiń tutqyndary, 9 Leningrad qorshaýynyń qatysýshylary, 2 Sotsialistik Eńbek Eri bar. Qazirgi ýaqytta ardagerler jastarmen birge eldiń ekonomikalyq jáne rýhani jańǵyrýyn jalǵastyrýda. Elimizdiń ál-aýqatyn jaqsartý úshin Joldaýdyń barlyq mindetterin belsendi túrde júzege asyratyn bolamyz. Ardagerler uiymdarynyń basty maqsaty – zeinetkerlerdiń quqyqtary men múddelerin qorǵaý, qozǵalystyń birligin nyǵaitý.
Óz kezeginde Sotsialistik Eńbek Eri Vera Sidorova:
– Búgin tarihi mańyzy bar oqiǵa oryn alyp otyr. Iaǵni, respýblikanyń ardagerler uiymy dúniege kelgen sátten bastap 35 jyl ýaqyt ótti. Búgin qalanyń ardagerler keńesiniń kóptegen músheleri kóptegen áleýmettik másellerdi talqylap, ekonomikalyq belsendi damýǵa qatysty birqatar oilar aityldy. Pleným óte jaqsy ótti. Barlyq ardagerler qarttar ómiriniń problemalaryn jaqsy biledi desek bolady. Kezinde zeinetaqy men jalaqylaryn qysqartyp tastaǵan qyzmetkerler ardagerlerden kelip kómek suraityn. Qalanyń ardagerler uiymy olardyń barlyq máselelerin sheshýge belsendi qatysty. Qazir de respýblika aldynda mindetter óte kóp. Men Prezidentimiz Qasym-Jomart Toqaevty óte qurmetteimin, ol diplomat, joǵary bilimdi adam. Ol halyq pen ardagerlerdiń ómirin jaqsartý úshin barlyǵyn jasaidy. Bizdiń mindetimiz – zeinetkerlerdiń ómirine qamqorlyq jasaý ǵana emes, sonymen qatar memleketimizdiń tutastyǵyna qamqorlyq jasaý. Meniń oiymsha, bizdiń halyq pandemiiany jeńedi. Barlyǵyńyzǵa baqyt tileimin jáne bizdiń respýblikamyz Keńes Odaǵynyń burynǵy odaqtas respýblikalary arasynda kóshbasshy bolsyn. Bul úshin barlyq múmkindikter bar. Ardagerler uiymy Memleket Basshysy qoiǵan barlyq mindetterdi iske asyrý úshin óziniń aqyl-keńesin, oiyn, tájiribesin, uiymdastyrýshylyq qabiletin bólisýge daiyn.
Konferentsiiada Almaly aýdandyq ardagerler keńesiniń tóraǵasy Jaqsylyq Ámirhanov óz oiyn bylaisha jetkizdi:
– Aýdanymyzdyń ardagerler keńesiniń basty mindetteriniń biri – jas urpaqty tárbieleý, Otanǵa degen súiispenshilikke baýlý, eńbeksúigishtikke úiretý jáne memleketimizdiń damýyna óz úlesin qosý. Jastar – bizdiń bolashaǵymyz, olar halqymyzdyń qundylyqtaryn saqtaýǵa tiis. Ardagerler qalanyń qoǵamdyq ómirine belsendi qatysady. Barlyq ardagerler men zeinetkerlerge azyq-túlik sebetteri jáne qaiyrymdylyq kómek túrinde qoldaý kórsetiledi. Biz meditsinalyq, turǵyn úi, kommýnaldyq qyzmetterdi jaqsartý boiynsha usynystar engizemiz, sondai-aq zeinetkerlerdi qorǵaý jáne qoldaý máseleleri sheshiledi. Sonymen qatar, aǵa býynnyń ómirin jaqsartý úshin mańyzdy mindetterdi sheshý boiynsha turaqty túrde kezdesýler ótkiziledi, – dedi ardager.
Al «Dańq» ordeniniń iegeri Sabira Áýelbaeva:
– Búgin otyrysta qalanyń ardagerler uiymdarynyń atqarǵan jumystary týraly esepter tyńdaldy. Ár aýdandaǵy ardagerler keńesi zeinetkerlerdiń ómirine qamqorlyq jasaidy, áleýmettik qyzmetkerlerdi usynady, úiirmelerge shaqyrady. Men Naýryzbai aýdanynda, qalanyń eń jas bóliginde turamyn. Biz ákimdikpen birlesip jumys isteimiz, jergilikti ardagerler men zeinetkerlerge ideologiialyq, aǵartýshylyq, qaiyrymdylyq kómek pen qoldaýdy jalǵastyramyz, qarttardy aýdannyń qoǵamdyq ómirine tartatyn bolamyz. Biz ómir súrý deńgeii men ál-aýqatyn kóterýimiz kerek, óz elimizdiń patrioty bolýymyz kerek jáne el igiligi úshin qolymyzdan kelgenniń bárin jasaýymyz kerek, – dep oiyn ortaǵa saldy.
Konferentsiia qorytyndysy boiynsha Qazaqstan ardagerler uiymynyń VIII sezine delegattar sailandy. Ardagerler uiymynyń Ortalyq Keńesi bekitken kvota boiynsha kelesi delegattarǵa daýys berildi:
- Izmuhanbetov Baqtyqoja Salahatdinuly, «QR Ardagerler uiymy» RQB Ortalyq keńesiniń tóraǵasy;
- Bijanov Aqan Qusaiynuly, Almaty qalalyq ardagerler keńesiniń tóraǵasy;
- Ámirhanov Jaqsylyq Nurtazyuly, Almaly aýdandyq ardagerler keńesiniń tóraǵasy;
- Qabdoldin Qudaibergen Nazaruly, Alataý aýdandyq ardagerler keńesiniń tóraǵasy;
- Ibraeva Batima Sapievna, Áýezov aýdandyq ardagerler keńesiniń tóraǵasy;
- Sidorova Vera Vasilevna, Sotsialistik Eńbek Eri;
- Áýelbaeva Sabira Qisaiqyzy, «Dańq» ordenderiniń iegeri;
- Tokpakbaev Sat Besimbaiuly, QR memlekettik qairatkeri, general-leitenant, ardagerler qozǵalysynyń belsendisi;
- Vladimir Nikolaevich Ýstiýgov, qalanyń ardagerler qozǵalysynyń belsendisi.
